ارضنا

امبارح بابا اخد اجازة من الشغل وكان عايز يروح الارض بتاعتنا وقالى تعالى معايا يا منى
حبيبى كان حاسس بيا وانى مبخرجش من البيت بقالى كتير
كانوا ساعتين بس بعمرى كله
كالعادة بلاقى راحتى هناك لما بكون متضايقه اوى
لانى الصبح مزاجى مكانش حلو علشان موضوع صاحبتى لانها عرفت انى حطيت حوارنا على المدونة وزعلت منى
ربنا يهديها يا رب
المهم كان اليوم تمام وعال خالص
وطول منا هناك بفكر انى اعمل موضوع عن الارض وقعدت اصور كذا مكان هناك لان كل مكان له ذكرى عندى
وكمان بسبوسة صاحبتى اتطمنت عليها واتكلمنا برضه
مع انها وحشانى والصراحه مش بحب اكلمها نت ولا تليفون
انا بحبها تبقى قدامى ونتكلم
كلام جميل كلام معقول واليوم زى الفل ومفيش حاجه تعكنن عليا
جدى كان فاتح نت وقالى مين اللى كان فاتح من شويه قلت له انا
قال لا امال فين محمد .. ده قال كلام مش حلو وشتيمه و و و
يا نهار ابيض والله يا جدو محمد نايم بقاله اكتر من 3 ساعات وانا اللى كنت موجوده
اللى حصل بقى ان ايميل اخويا اتسرق والظريف اللى سرقه قال كلام مش عارفه اقول ايه ياربى غير حسبى الله ونعم الوكيل
طبعا حصل تحول على طول ودخلت نمت ولا عملت موضوع الارض ولا اى حاجه
صحيت واثار العكننه عليا
بابا كان رايح شغله قلت له انا عايزة اروح الارض
خدنى معاه وسابنى هناك وقعدت فى البيت اللى بانينه
على ما يرجع من شغله ويفوت عليا ونروح بقى
طبعا كان قلقان بس محاولش يبين ده قدامى
وهو حاسس انى متضايقه ومش ههدى غير لما اقعد فى الارض
ماما طبعا برضه قلقانه وتقولى طيب ابعت ليكى اختك علشان تقعد معاكى
لا ياماما سيبها براحتها وبعدين انا عايزه اقعد مع نفسى
طبعا طول الوقت اتصالات للاطمئنان عليا ومهما كانت ماما بتضحك وتهزر معايا حاسه فى صوتها انها قلقانه
ربنا يخليكو ليا يا ماما انتى وبابا
والحمد لله ان انتو امى وابويا
وشكرا لكل واحد فيكم انه احسن الاختيار
انت اخترت يابابا ام اتشرف بيها وهى كمان اختارت اجمل اب فى الدنيا
الحمد لله رب العالمين
سيبكو بقى من الكلام الكتير اللى فوق وخلينا مع الصور وحكاياتها
محدش يتريق على تصويرى.. انا بقول لكم اهو


ده بيتنا اللى هناك .. لسه مكملش
كان نفسى اوى يكمل علشان نقعد فيه كلنا
وانا هناك عملت فيها فلاحة شطورة كده وجمعت الجرجير ده من الارض هههههه
واخدت معايا كتاب" ايزيس واوزوريس " على امل انى اخلصه برضه معرفتش .. بقالى كتير بقرأ فيه ومش راضى يخلص
اما الكورة الخضرا دى عجبتنى اوى مطاط كده وجميله
قعدت العب بها براحتى بقى مهو مفيش حد شايفنى وقلت فرصه ارجع طفلة من تانى
دى بقى شجرة التوت .. ياما طلعت عليها وانا صغيرة
عم ابراهيم صاحب المشتل اللى فى اول الطريق له جملة دايما بيقولها
يا حلو تحت التوته
اكتشفت انها اغنية قديمة
وطلعت تحفه بجد
اضغطوا على اسمها للتحميل
تحت الشجرة دى كنت بذاكر انا وبسبوسة ايام الدبلومة
وكنا بنمشى لغاية الارض ومنركبش مواصلات علشان نذاكر ونلاقى جو هادى
اييييييييه ايام
المنظر ده بيطل من احدى البلوكونات فى الشقة
ياسلام بقى لما الواحد يصحى الصبح ويشوف الجمال ده قدامه
" معلش الصورة وحشه علشان الشمس ومش واضحه اوى"
بس ده المفروض بحر يعنى
اللى هو ده من قريب
ياما كنت بصطاد هناك وانا صغيرة
من زمان ما اصطادتش ومعدش فيه سمك.. الا هو راح فين؟
وراه بمسافه بعيدة شوية شريط القطر اللى بيروح على كفر الشيخ
كل ما اسمع صوت القطر افتكر ايام الدبلومة واحن لها اوى
اللى ورا الشجر اللى هناك ده مزرعة فراخ والمنطقة دى حواليها اربع مزارع تقريبا
وانا فى ابتدائى كنا بناخد فى الدراسات ان الشجر بيعمل كمصدات للرياح
طيب وهى فين الرياح اصلا ولا هيصدوها ليه
اسأل بابا يقولى علشان الشمس
اخخخخخخخخ انا مخى بقى عطلان على الاخر
ما علينا
المهم ان فيه كذا مشروع صغير فى المنطقه ومش واخد مكان وتكلفته قليلة وده عاجبنى جدااااا
وواحد دماغه شغالة عمل قاعة افراح هناك بس طبعا مغلقة
ودعاية للقاعة عمل المواصلات على حسابهم لان المنطقه هناك صعب الناس تلاقى مواصلات وخصوصا بالليل
دى شجرة الجوافة بتاعتى
بحبها اوى وبحب اقعد تحتها وايام الكلية كنت بقرأ رواياتنا اللى بناخدها فى اداب تحتها
كانت اخر روايه
Victory
لجوزيف كونراد
والله ماكنت فاهماها واسلوب الكاتب صعب اوى اصلا ولغاية دلوقتى مش فاهماها واهو عدى 3 سنين كمان
ههههههههههههههههههههههه
ـــــــــــ ـ ـ ـ ــــــــــــ
لسه فيه كمان ذكريات محفورة جوايا
عمرى ما اقدر انساها
بجد الارض دى نعمة كبيرة اوى من ربنا
الحمد لله رب العالمين

نفسى اعمل فرحى هناك فى الارض وميكونش فى قاعة
ويبقى بالنهار بعد صلاة العصر كده
من الاخر زى نظام الاجانب
بس طبعا اخدت تريقه من الكل على الفكرة دى



خلاص انا خلصت
نفسى بقى مزعلش من اى حاجه
لما سميت المدونة ساعات ساعات مكنتش اعرف ان هحسها اوى كده
الحمد لله الذى هدانا لهذا وما كنا لنهتدى لولا ان هدانا الله