حياتى المهنية.. الجزء التانى

السلام عليكم ورحمة الله وبركاته

اولا الف شكر لكل اللى سأل على شغلى فى المدرسة
ربنا يخليكو ليا يارب
واحب اقول لكم
قدر الله وما شاء فعل
محصلش وانى رجعت المدرسة
واختاروا ناس تانية
الحمد لله انا مش زعلانة والله
جايز علشان انا عرفت الخبر ده وايمانى زايد وكنا فى ايام رمضان
وكنت سمعت قصة عن الرضا بقضاء الله

عروة بن الزبير، هو ابن أخت السيدة عائشة رضي الله عنهم ذهب ذات يوم هو وابنه لأمير المؤمنين في دمشق فذهب الصبي ليلعب مع الخيل فدهسته فمات. وعندما أرادوا إخباره بما حدث ذهبوا ليلقوه وقد أصابته الآم شديدة في ساقه وأخبره الأطباء عن وجود ورم فيها ولابد من بترها. فما علم الناس فيما يعزونه: فقد ابنه أم بتر ساقه.
قال عروة بن الزبير: اللهم لك الحمد كان لي سبعة أبناء أخذت واحداً وأبقيت ستة، وكان لي أربعة أعضاء أخذت واحداً وأبقيت ثلاثة، فإن كنت قد أخذت فقد أبقيت، وإن كنت قد منعت فقد أعطيت، فلك الحمد على ما أخذت ولك الحمد علي ما أبقيت ولك الحمد علي ما منعت ولك الحمد علي ما أعطيت

بجد اثرت فيا اوى الحمد لله
وبعدين انا طلعت من المدرسة دى بأصحاب جميلة اوى
وكان فرح واحده منهم امبارح ماشاء الله كانت عسولة اوى ربنا يبارك لهم يارب
وعقبالى بقى وكل البنات والولاد يااااااااااااارب

ـــــــــــ ـ ـ ـ ـــــــــــ

ثانيا انا عملت اللى عليا برضه ورحت قدمت فى الادارة
قدمت انجليزى والحمد لله البشر كتير وكل ما اروح اسأل على النتيجة الموجه يقولى الاسبوع الجاى ان شاء الله
طبعا باينه كده

قلت اقدم كمبيوتر كمان وايه المشكلة يعنى
الاقى الحظ بقى يقولوا خلاص معدناش بناخد غير اللى تخصصهم حاسب الى بس
اللى بتاخد الملفات انا صعبت عليها بصراحه وقالت لى ورينى ملفك كده
انتى تخصصك ايه ؟
انجليزى
طيب ما قدمتيش انجليزى ليه؟
قدمت بس كل ما أسأل يقولوا الاسبوع الجاى
ولا هيبصوا فى الورق من اساسه
الله يطمنك
ما شاء الله انتى واخده دبلومه كمان؟
ايوه
والكورسات دى كلها؟
ايوه
واحده جنبها قالت : فعلا بلد بتاعة شهادات صحيح
بصى يا بنتى انا هاخد ملفك وعلى الله يشفوه ويفتحوه .. ربنا يوفقك
ربنا يخليكى يارب( بينى وبين نفسى بقول تعاطفك لواحده مش كفايه).. اه معلش لو سمحتى هو اللى بيقدم مكتبات بيقدم فين؟
فى المدرسة المهنية.. انتى ممكن تقدمى فيها علشان معاكى دبلوم عام.. اجيلبك تصورى نسخه من ورقك وتروحى تقدمى؟
لا شكرا انا عامله نسخ كتيييييييير عندى
ربنا يوفقك يا بنتى

------

المشهد التانى فى المدرسة المهنية

لو سمحت هو اللى بيقدم مكتبات فى اى مكان هنا؟
الاوضه دى
شكرا

---

السلام عليكم
وعليكم السلام ورحمة الله وبركاته
تقديم المكتبات هنا لو سمحتى؟
ايوه يا بنتى
طيب ده الملف بتاعى يا ترى فيه ورق ناقص؟
انتى تخصصك انجليزى.. طيب ما قدمتش انجليزى ليه؟
قدمت .. بس مش باينلها قبول هما كتير اوى وكل ما اسال يقولوا الاسبوع الجاى
مع انك مش اى تخصص ده انتى انجليزى
اللى حصل بقى.. طيب هو فيه امل انى اقبل مكتبات لاحسن انا خلاص تعبت والله
ان شاء الله يا بنتى مش انتى واخده دبلومه يبقى فيه امل ان شاء الله
ياااااااااااااه قلبى اتطمن ربنا يبارك فيكم.. طيب هعرف النتيجه امتى؟
شويه كده ما تستعجليش
اوكى الف شكر

----

انتهت المشاهد على خير
وادينى بعمل اللى عليا
بينى وبينكم انا قلت ارتاح السنة دى وهى مش هتكون زى لما خلصت الكلية 2006 يعنى ظروفى اختلفت الحمد لله
وبعدين مدونتى حبيبتى موجوده وانتو كمان
واكتشفت ان قعدة البيت جميلة الى حد ما
اعتقد ان نتيجة التقديم هتكون على التيرم التانى
ويا سلام بقى لو قبلت مكتبات
انا بموت فى الكتب اساسا
وهتبقى حاجه حلوة لما ادخل للتلامذه بتوعى واحكيلهم قصص
فانا اريح نفسى واعصابى لغاية ما ربنا يسهل بقى
معلش طولت عليكم
كان يوم طويل وصعب بس جميل برضه اصل وحشتنى البهدله
اه من الحق كل سنة وانتم طيبين
النهاردة 6 اكتوبر عيد النصر

Comments

romansy said…
اول تعليق


محــــــجــــــوز


ل


رومــــــــــانـــسى
romansy said…
يارب تحققى اللى بالك وتبقى احلى واجمل مدرسه
واتمنى ساعتها ان اكون تلميذ فى فصلك
بس اوعى تضربى
Unknown said…
قدر الله وماشاء فعل معلش انت طبعا متاكدة ان دة اللى فيه الخير ليكى اكيد وان شاء الله نسمع اخبار حلوة قريب
خير خير خير
تفأل تفأل تفأل
ابتسم ابتسم ابتسم
اضحك اضحك اضحك

بكرة اكيد فى خير
فى تفاؤل بلا حدود
فى بسمة عنوانها الخلود
فى ضحكة ممدوده بلا حدود
فى رب عرش موجود
الرزق عنده نصيب ووجود
اقرء ان شئت فى اسمائه
الررزاااااااااق
ذو القوة المتين


والله لو حكينا الامثال التى تغير حالها من حال الى حال
لن تصدقى
الصبر باب الخير

تحياتى
Selfmeaning said…
قدر الله ما شاء فعل
و خيرها فى غيرها
و بعد كده مفيش احلى من القعده فى البيت و عبقالى ان شاء الله
EMMY BABY said…
قدر الله وماشاء فعل

المهم ياحبيتى انك راضية ودى اهم حاجة

ربنا يوفقك يارب ويرزقك الخير كله وييسرلهولك

سلام يا منمن ياقمر

تحياتى

ايمى
ههههههههههههههههه

بتفكريني يانونا بيا

لما رحت الازهر كانوا عاوزين مدرسين

قدمت كمبيوتر وتاريخ

ولو كانو وافقوا علي حاجه تانيه كنت هعملها

والموظفين بقي مقولكيششششششششش

ياختي ايه الهنا اللي احنا فيه ده

ان شاء الله ربنا هيقدملك كل خير ياحبيبتي
الله يوفقك يا منى ...
وان شاء الله تقبلي في المكتبات...
وكل عيد نصر وانتي بخير..
Mona Shereif said…
romansy
----------
والله ما تفرق اول تعليق من اخر تعليق اهم حاجه انك شرفتنا بردك الكريم
واتكمن يا سيدى انا مش هضربك بس لو كنت مشاغب يبقى انت اللى جبته لنفسك




enjy
------
الحمد لله يا انجى فعلا وحسيت ان ده الخير ليا
الحمد لله رب العالمين




ABOALI
--------
عايزه اقولك ان تعليقك لفت نظر اخويا جدا
اه والله
يمكن اول مره يعلق على رد موجود عندى
"خير خير خير
تفأل تفأل تفأل
ابتسم ابتسم ابتسم
اضحك اضحك اضحك"
حاضر:)
وفعلا الصبر مفتاح الفرج
ربنا يرزقنا الصبر






Selfmeaning
---------------
الحمد لله
هههههههههههههههههه لالالا انا قلت القعده فى البيت جميلة الى حد ما
انما لازم اثبت نفسى بره كمان
عقبالك ايه يا شيخه حرام عليكى





EMMY BABY
-----------
الحمد لله يا ايمى وربنا يرزقنا الرضا دايما
يارب اللهم امين
ربنا يبارك فيكى يا ايمى يااااااااااارب






كيارا
---------
ههههههههههههههه
عادى يا بنتى انا اشتغلت سنة مدرسة كمبيوتر على فكرة
ههههههههههههههههههه
وكمان فى الخاصة كنت ماسكة انجليزى وكمبيوتر
عاااااااااااااادى اهو اى حاجه والسلام الاقى فيها نفسى
ربنا يبارك فيكى




M.K
------
يارب ان شاء الله
الف شكر يا حبيبتى
تصدقى انتى الوحيده اللى باركتى علشان 6 اكتوبر
خير خير خير
Meme said…
hi mona
last week a little problem happened at my work -i work at a clinic by the way-so i had to move to another place... i was very upset and i hated my boss but as soon as i start working at that new clinic i found it much much better from the old one..and my new boss is quite gentelman....my point is
و عسى ان تكرهو شيئا و هو خير لكم
keep trying and be sure that allah will choose the best thing for you.
may god bless you coz you deserve all the best
Mona Shereif said…
meme
-------
hi honey.. how are you
miss you soooo much
yea i am sure that Allah know the best for us
the story in this post about the man who lost his son and his leg at the same time makes me happy..
thanks dear for your prayer
and i hope you fell better and better in your work
many thanks
I am a Muslim ! said…
سيبيها على الله

محدش يعرف الخير فين
بصى خدى نصيحة مجرب

ربنا بيقول
بسم الله الرحمن الرحيم
فقلت استغفروا ربكم إنه كان غفارا * يرسل السماء عليكم مدرارا * ويمددكم بأموال وبنين ويجعل لكم جنات ويجعل لكم أنهارا *
صدق الله العظيم

صدقينى عن تجربه
كثرة الأستقفار هتساعدك جدا :)

ــــــــ
مدونه جميله ان شاء الله اتابعها دايما

Popular posts from this blog

الجوز الخيل

ارادة الله لا قرارى

اذن يا بلال