تحويشة كلام

انا عارفة انى مجنونة
لسه عاملة موضوع اغنية عن الرسول صلى الله عليه وسلم البوست اللى فات يمكن من دقايق
بس قلت اعمل واحد تانى

هتكلم عن اى حاجة وفى اى حاجة
انا انذرتكم دى تحويشة اسبوع بحاله
يعنى محدش يقولى صدعتينى
ابدأ بايه ابدأ بايه ابدأ بايه
مش عارفه
بس انا اتعلمت حاجات كتير اوى الاسبوع ده
لقيت كام مقالة عن اركان الاسلام بالانجليزى
the five pillars of Islam
واتعرفت على مفردات جديدة مكنتش اعرفها قبل كده
تعرفوا ان معنى كلمة ركعة بالانجليزى
unit
وكمان الاحاديث الشريفة لرسول الله محمد صلى الله عليه وسلم اسمها
the traditions of Muhammad
وضوء يعنى
ablution
والخمس صلوات بيتكتبوا كده
Fajr.. the dawn prayer
Dhur.. the early afternoon prayer
Asr.. the late afternoon prayer
Maghrib.. the evening prayer
Isha.. the night prayer
وصلاة الجماعة اسمها
congregational prayer
الاقامة يعنى
summons

قرأت كتاب الصحة الاجتماعية لقيته عند اخويا المفروض بيدرسه
فيه معلومات هايلة بجد وفى اخر الكتاب مجموعة من الممارسات الشعبية فى دلتا مصر والطب الشعبى وكده
ومجموعة امثال حلوووووووة
وبمناسبة الامثال جدتى كانت قالت واحد عجبنى اوى " بعد الكتير وبعد ما كنا ... صبح القليل يرضى خواطرنا" مش هقولكم كانت بتقولها والدموع ماليه عنيها ازى... ربنا يخليكى لنا يارب ويديكى الصحة ويروق لك بالك يااااااااارب

البدرية منسية
ده برضه مثل بيتقال وفعلا صح جدااااا
لما عملت اللى ورايا فترة الصبح دى بجد حسيت انى فاضية خالص وبالى رايق .. انا جربتها يوم واحد يارب افضل اداوم عليها ولو انى بقالى يومين مش كده خالص ههههههههههههههههه

اه قرأت جزء فى كتاب الرجال من المريخ والنساء من الزهرة... الكتاب ده فعلا كويس
بيقول الكاتب ان الرجال زى الحزام المطاط بيبعد بيبعد بس لازم بيقرب تانى هما بس بيحتاجوا لوقت يبقوا مع نفسهم وبعيد.. ولما اكون متضايقه وعايزه الوم بلاش الومه او اكلمه وانا فى المود ده واحاول اخرج الكلام ده فى ورق او انى اكلم حد تانى

مش عارفه افتكرت اول ما دخلت اعدادى وكان اجبارى اننا نلبس ايشارب مع زى المدرسة
وفعلا التزمت بيه ومرة كنت خارجه من البيت ورايحه مشوار من غير الايشارب وكنت مكسوفه اوى وحاسه ان فيه حاجه ناقصانى
اى نعم كنت بلبسه ونص شعرى بيبقى باين منه... اصلى مكنتش اعرف ليه هو حجاب
لغاية ما دخلت الجامعه والحمد لله بقيت التزم بالحجاب صح وكفاية نظرة الاحترام اللى بشوفها فى عنين الناس والتعامل كمان
الحمد لله على نعمة الحجاب

الحلال حلو اوى اوى اوى
بجد حاجه حلوه لما البنت تجرب حاجات لاول مره مع اللى ربنا كتبهولها ومن نصيبها
يا بنات متستعجلوش واصبروا محدش بيتجوز مرات حد
بقيت اخاف على الشباب اوى
يارب احفظهم يارب

يوم الاحد اللى فات كنت متضايقة اوى وبعيط من كذا موقف وان الصغير معادش بيحترم الكبير..
الكبير لو زعقلك يبقى خايف عليك ليه انت شايف انه بيكرهك
كمان احساس صعب لما تحس ان البعيد عنك قرب بس برضه حاسس انه بعيد اوى يمكن لما كان بعيد كان اقرب من وهو قريب
خرجت مش عارفه انا رايحه على فين بس قلت لازم اسعد نفسى
اشتريت شيبسى وعصير واكلت فى الشارع
هنقول صح ولا غلط انا مش عارفه
المهم انى كنت فرحانه وانا بعمل كده

بتابع مدوناتكم من غير ما اسيب تعليقات ليه مش عارفه
والله يمكن ما بيفوتش كام ساعه على بعض من غير ما افتح مدوناتكم
جايز وحشنى احساس لما الاقى مدونة حلوة وعلى مزاجى وامسكها من اولها لاخرها قراية وكمان اقرا التعليقات
بس انا بقرأ لكم كل كلمة

حاجة اخيرة بقى
هى كتابة اليوميات غلط؟
يعنى من الاخر اللى انا بعمله فى المدونة ده غلط
بس فعلا انا دورت على حاجه تانيه ما لقيتش نفسى غير فى كده
ولقيت راحة كبيرة بوجود مدونتى وكتابة الكلام ده ... ليه كمان اتحرم من الراحة دى
لما سمعت من كذا شخص وقالى ان كتابة الحاجات واليوميات دى غلط - مع العلم ان الناس دى بجد خايفه عليا وانا عارفه انهم بيتمنوا الخير ليا- بس كانت نفسيتى هباب اوى
ياريت تجاوبونى ووحشتونى وكمان سامحونى
سلام عليكم