حياتى المهنية.. الجزء التانى

السلام عليكم ورحمة الله وبركاته

اولا الف شكر لكل اللى سأل على شغلى فى المدرسة
ربنا يخليكو ليا يارب
واحب اقول لكم
قدر الله وما شاء فعل
محصلش وانى رجعت المدرسة
واختاروا ناس تانية
الحمد لله انا مش زعلانة والله
جايز علشان انا عرفت الخبر ده وايمانى زايد وكنا فى ايام رمضان
وكنت سمعت قصة عن الرضا بقضاء الله

عروة بن الزبير، هو ابن أخت السيدة عائشة رضي الله عنهم ذهب ذات يوم هو وابنه لأمير المؤمنين في دمشق فذهب الصبي ليلعب مع الخيل فدهسته فمات. وعندما أرادوا إخباره بما حدث ذهبوا ليلقوه وقد أصابته الآم شديدة في ساقه وأخبره الأطباء عن وجود ورم فيها ولابد من بترها. فما علم الناس فيما يعزونه: فقد ابنه أم بتر ساقه.
قال عروة بن الزبير: اللهم لك الحمد كان لي سبعة أبناء أخذت واحداً وأبقيت ستة، وكان لي أربعة أعضاء أخذت واحداً وأبقيت ثلاثة، فإن كنت قد أخذت فقد أبقيت، وإن كنت قد منعت فقد أعطيت، فلك الحمد على ما أخذت ولك الحمد علي ما أبقيت ولك الحمد علي ما منعت ولك الحمد علي ما أعطيت

بجد اثرت فيا اوى الحمد لله
وبعدين انا طلعت من المدرسة دى بأصحاب جميلة اوى
وكان فرح واحده منهم امبارح ماشاء الله كانت عسولة اوى ربنا يبارك لهم يارب
وعقبالى بقى وكل البنات والولاد يااااااااااااارب

ـــــــــــ ـ ـ ـ ـــــــــــ

ثانيا انا عملت اللى عليا برضه ورحت قدمت فى الادارة
قدمت انجليزى والحمد لله البشر كتير وكل ما اروح اسأل على النتيجة الموجه يقولى الاسبوع الجاى ان شاء الله
طبعا باينه كده

قلت اقدم كمبيوتر كمان وايه المشكلة يعنى
الاقى الحظ بقى يقولوا خلاص معدناش بناخد غير اللى تخصصهم حاسب الى بس
اللى بتاخد الملفات انا صعبت عليها بصراحه وقالت لى ورينى ملفك كده
انتى تخصصك ايه ؟
انجليزى
طيب ما قدمتيش انجليزى ليه؟
قدمت بس كل ما أسأل يقولوا الاسبوع الجاى
ولا هيبصوا فى الورق من اساسه
الله يطمنك
ما شاء الله انتى واخده دبلومه كمان؟
ايوه
والكورسات دى كلها؟
ايوه
واحده جنبها قالت : فعلا بلد بتاعة شهادات صحيح
بصى يا بنتى انا هاخد ملفك وعلى الله يشفوه ويفتحوه .. ربنا يوفقك
ربنا يخليكى يارب( بينى وبين نفسى بقول تعاطفك لواحده مش كفايه).. اه معلش لو سمحتى هو اللى بيقدم مكتبات بيقدم فين؟
فى المدرسة المهنية.. انتى ممكن تقدمى فيها علشان معاكى دبلوم عام.. اجيلبك تصورى نسخه من ورقك وتروحى تقدمى؟
لا شكرا انا عامله نسخ كتيييييييير عندى
ربنا يوفقك يا بنتى

------

المشهد التانى فى المدرسة المهنية

لو سمحت هو اللى بيقدم مكتبات فى اى مكان هنا؟
الاوضه دى
شكرا

---

السلام عليكم
وعليكم السلام ورحمة الله وبركاته
تقديم المكتبات هنا لو سمحتى؟
ايوه يا بنتى
طيب ده الملف بتاعى يا ترى فيه ورق ناقص؟
انتى تخصصك انجليزى.. طيب ما قدمتش انجليزى ليه؟
قدمت .. بس مش باينلها قبول هما كتير اوى وكل ما اسال يقولوا الاسبوع الجاى
مع انك مش اى تخصص ده انتى انجليزى
اللى حصل بقى.. طيب هو فيه امل انى اقبل مكتبات لاحسن انا خلاص تعبت والله
ان شاء الله يا بنتى مش انتى واخده دبلومه يبقى فيه امل ان شاء الله
ياااااااااااااه قلبى اتطمن ربنا يبارك فيكم.. طيب هعرف النتيجه امتى؟
شويه كده ما تستعجليش
اوكى الف شكر

----

انتهت المشاهد على خير
وادينى بعمل اللى عليا
بينى وبينكم انا قلت ارتاح السنة دى وهى مش هتكون زى لما خلصت الكلية 2006 يعنى ظروفى اختلفت الحمد لله
وبعدين مدونتى حبيبتى موجوده وانتو كمان
واكتشفت ان قعدة البيت جميلة الى حد ما
اعتقد ان نتيجة التقديم هتكون على التيرم التانى
ويا سلام بقى لو قبلت مكتبات
انا بموت فى الكتب اساسا
وهتبقى حاجه حلوة لما ادخل للتلامذه بتوعى واحكيلهم قصص
فانا اريح نفسى واعصابى لغاية ما ربنا يسهل بقى
معلش طولت عليكم
كان يوم طويل وصعب بس جميل برضه اصل وحشتنى البهدله
اه من الحق كل سنة وانتم طيبين
النهاردة 6 اكتوبر عيد النصر