تاج سبعاوى.. من ايمى

أذكر ستة أسرار قد لا يكتشفها من يقابلك لأول مره!!!؟
انا كنت حليت السؤال ده فى واجب جانى من اينو.. وما اعتقدش ان اجابته اتغيرت
http://sometimes-good-bad.blogspot.com/2008/07/blog-post.html
ـــــــــــــــــ ـ ـ ـ ــــــــــــــــــ

سبع حاجات نفسك تعملهم!!!
1- نفسى انى ازور بيت الله
2- نفسى امارس اللغة اللى قضيت حياتى كلها اتعلمها وصدت من قلة الاستخدام والممارسة
3- نفسى يبقى عندى بستان كبييييييييييير وفيه نخل جميل كدة وكتييييييييييير واعمل حاجه بينى وبين ربنا
4- نفسى احفظ كتاب الله اوى و نفسى اقرب من ربنا اكتر واكتر
5- نفسى اكون حاجة بجد.. واتغير للأحسن
6- نفسى افضل اتعلم طول عمرى وادرس
7- نفسى اطيع امى وابويا على طول ومايزعلوش منى ابدا
ـــــــــــــــــ ـ ـ ـ ــــــــــــــــــ

سبع حاجات معرفتش تعملهم!!!
1- معرفتش اجيب تقدير وطلعت بمقبول فى الليسانس بس اتعوضت فى الدبلومة الحمد لله
2- معرفتش استمر مع صناع بس كان غصب عنى
3- معرفتش امارس الانجليزى وانا بقالى سنتين دلوقتى مش بستخدمه لما صدى ااووووى وبجد ندمانه بس مش عارفه اعمل ايه ياريت لو فيه نصيحة منكم يبقى كتر خيركم اوى
ـــــــــــــــــ ـ ـ ـ ــــــــــــــــــ

سبع حاجات دايما بتقولهم !!!؟
الحمد لله
يارب
وكدة يعنى
انتى يا حاجه
يختى كميلة
يا قمر
خير قدر الله وما شاء فعل
ـــــــــــــــــ ـ ـ ـ ــــــــــــــــــ

سبع مشكلات فى حياتك ممكن تحليهم بالفلوس!!!
الحمد لله مفيش مشكلات تتعلق بالفلوس بما انى فى بيت والدى حاليا... انما اعتقد لو بقيت مسئولة عن بيت اكيد هحتاج الفلوس
ـــــــــــــــــ ـ ـ ـ ــــــــــــــــــ

سبع أماكن بتحبها!!!
1- بحب الارض بتاعتنا جدااااااااااااا واتمنى اقعد هناك على طول
2- بحب الشارع بتاعنا وهفتقده لما اتجوز بجد .. لانه هادى وبحس انه حته من البيت
3- بحب البحر
4- بحب المواصلات جدا- طبعا متكونش زحمة - واتمنى افضل مسافرة على طول ونفسى اجرب الطيارة بقى
5- بحب المساجد اوى برتاح فيها وبلاقى سكينه كده
ـــــــــــــــــ ـ ـ ـ ــــــــــــــــــ

سبع أشخاص بحبهم غير بابا وماما واخواتى!!!
اشمعنى يعنى؟
طيب انا بحب والدتى مش (ماما) وبحب والدى مش (بابا ) - ادعوله اوى بالله عليكم لانه تعبان اوى- وبحب اختى واخويا جدا - ربنا يخليهم ليا بجد وما يحرمنى منهم ابدا وتفضل الفرحة فى بيتنا وبيوت المسلمين كلهم يارب العالمين
نبدأ السبع اشخاص بقى:-

بسبوسة صاحبتى .. بجد مفتقداها اوى ومكنتش اعرف انها غالية عندى للدرجة دى نفسى ايام زمان ترجع يا حبيبة قلبى .. فاكرة لما كنا بنوصل بعض لما بتكونى عندى واتصورنا الصورة.. ولا لما كنا بنروح نذاكر فى الارض ونمشى المشوار ده كله.. فاكره كمان لما بعتيلى رساله وفيها جزء من مقالة وانا كنت فى نفس الوقت ده بكتب المقاله علشان اوريهالك.. فاكرة لما اشتريت حاجه ولقيتك شاريه زيها.. فاكرة يوم ما كنا رايحين الكلية وماتكلمناش ولا كلمة لغاية ما ركبنا القطر وحصل موقف كده وبعدها قعدنا نضحك وانا قلت انا نويت ما اتكلمش لانى بقيت لكاكه اوى وساعتها لقيتك بتقولى ده اللى انا كنت ناوياه وقعدنا نضحك بطريقة صعبه والناس اللى حواليا افتكرونا مجانين... وحشينى اوى
- استاذ ماهر مدرس الانجليزى بتاع ثانوى.. بحترمه جدا وبحب اتكلم معاه
- دكتور فتحى.. كان بيعالج جدو الله يرحمه وانا كنت بروح معاه ومن يومها واحنا تقريبا اصدقاء
- اصحابى كلهم الحمد لله ويارب يفضل الود بينا دايما
- بحب المدونين كلهم اوى لانهم دخلوا قلبى من غير استئذان وان شاء الله دايما فى قلبى
ـــــــــــــــــ ـ ـ ـ ــــــــــــــــــ

سبع حاجات بتحبهم قوى!!!
1- القراءة
2- الطبيخ بمزاج
3- المذاكرة والدراسة
4- الافلام الاجنبى وخصوصا بتاعة الاطفال -وكمان الرومانسية اللى هى بتاعة البنات دى - ممكن التاريخية.. بس بجد اليوم اللى بتفرج فيه على فيلم اجنبى ببقى سعيدة مش عارفه ليه وبحس انى رجعت منى بتاعة زمان.. يمكن علشان وانا فى ثانوى كنت بقعد قدام الفيلم بالورقة والقلم واكتب المصطلحات الجديدة انما بعد ما دخلت الكلية معدتش بعمل كده هههههههههههههه لقيت الانجليزى كتير اوى- انا فاكرة سنة اولى دى كنت بقرأ الكتب وخلاص وزى ما تيجى تيجى بقى ههههههههههههههه والله ما كنت بفهم كل الكلام - فجأة لقيت كل حاجه قدامى انجليزى.. يلا الحمد لله عدت على خير
ـــــــــــــــــ ـ ـ ـ ــــــــــــــــــ

سبع مدونات بتحب تقرالهم!!!
كلهم الحمد لله
بس انا بهتم بالمدونات اللى فيها قصص جداااااااااا
ماليش فى السياسة ومبحبهاش خالص
اى معلومة جديدة تفيدنى احبها
بحب الشعر برضه اوى وبالأخص الرومانسى منه
ـــــــــــــــــ ـ ـ ـ ــــــــــــــــــ

تمرر الواجب/التاج لمين؟
لكل اللى يحب يجاوب عليه

ملحوظة: هبقى اكمل السبعات كل ما افتكر حاجة
شكرا يا ايمى على التاج
ربنا يخليكى ليا ياقمر