القراءة للحياة

السلام عليكم يا أجمل اصحاب

الموضوع ده كنت كتبته من ايام القراءه للجميع السنة دى بس محصلش ونشرته على المدونة

اللى فكرنى بيه انى رحت النهارده مكتبة وجبت كتاب "ايزيس واوزوريس" ان شاء الله هقراه بس بعد رمضان

شكرا يا زوزو على يوم النهاردة.. بجد انا فرحانه وحاسة ان روحى رجعتلى

المهم ده نص الموضوع

ــــــــــــــ ــ ــ ــ ـــــــــــــ

اوبريت الكنز

القراءة للجميع

القناة الاولى المصرية

من زمان اوى ما اتفرجتش على القناة الاولى , فتحتها النهاردة لقيت اوبريت الكنز للقراءة للجميع. ياااااااااااااااه من زمان اوى مش شفت الحاجات دى من ايام ماكنت صغيرة اوى يمكن ايام ابتدائى ولا اصغر كمان.. زى اوبريت الليلة الكبيرة والحاجات الجميلة دى

كل اللى شفته كان تقريبا 5 دقايق وهحكيهم ليكو

كان بيحكى عن 3 اشخاص بيغنو علشان يروحو لبكره وجه واحد عايز يروح معاهم لبكره, بصوله باشمئزاز ومشيو. وكان مجموعه قاعدين على قهوه بيتكلموا نادوا عليه وقالوله لازم تفكر فى بكره علشان تروحله وتوصله, انت اخرك اول امبارح. وقام واحد شكل نجيب محفوظ وقاله لو عايز تروح لبكره فكر ... فكر مثلا فى جدك , قاله يااااااااااه جدى، وفجأه ظهر جده على المسرح وبدأ يسلم على بيرم وطه حسين والعقاد و....... وفى وسط ده كله، الولد كل شويه يقوله يا جدى انت مش عارفنى ولا ايه؟ قاله وانت كنت فين لما كنت تعبان وفى ايامى الاخيرة ، دول بس اللى كانوا معايا وجبنى. قال الولد ايوه عندك حق سامحنى يا جدى سامحنى والله مش هدخل جنه الا لما تسامحنى. سابه لواحده قاعد يعيط بعد ما سأله عن حبيبته

وفجأه ظهرت حبيبته وهى بتحاول تصحى الولد من النوم وكان متغطى بالكتب وهى كانت بترد له شبكته والدبدوب- الى جابهولها فى الفلانتين- ومشيت....... لكن كان شكسبير يتكلم على لسان الولد, رجعت مش مصدقه نفسها بس لاء قالت ده مش ممكن يخلينى ارجعلك وساعتها هتف صلاح جاهين ب"على اسم مصر" برده على لسان الولد. البنت برده مش مصدقه نفسها وقالت له معقول قرأت كل ده؟؟؟ قالها ايوه ساعات اوكلوكس سمتايمز. قالت له اوكلوكس خلاص بقى انا ماشيه قالها لاء وغنوا اغنية جميلة جدا

ساعتها بجد انا حبيت مصر

مصر مش اسم فى بطاقه مصر طاقه وانطلاقه

انت عارف مصر عايزة منا ايه؟؟

بحبك اوىىىىىىىىىىىىى يا مصر

بحبك مهما عادوا ولا زادوا ولا قالوا عنك

ــــــــــــــ ــ ــ ــ ـــــــــــــ

بالمناسبة لو حد يعرف الاغنية دى ياريت يقولى على طريقها

حصل كمان وانى سمعت قصص القران لعمرو خالد امبارح" على فكرة البرنامج ده جباااااااااااااااااااار .. ياريت تسمعوه"

وكانت بتتكلم عن قصة سيدنا موسى والخضر

وطبعا محورها العلم

واستاذ عمرو خالد قال شوية نقاط فى الاخر كده تساعدنا على اننا نتعلم اكتر واكتر

وكان منها..

1

انك تحاول تكتب

( قصص - شعر - مقالات او حتى يوميات )

2

نقرا كتاب كل اسبوع

مش شرط يعنى نشتريه ممكن نحمله من على النت- انا عارفه ان متعة الكتاب انه يبقى معاك فى كل مكان ويكون شئ مادى وملموس

3

قراية جريدة هادفه يوميا

هو قال حاجات كتير بس دول اللى ركزوا فى دماغى

عموما بجد البرنامج اكثر من رائع

هو بيتذاع على قناة الرسالة الساعة 10 مساءا بتوقيت القاهرة

والاعادة الساعة 10 صباحا فى اليوم التالى على الرسالة

وكمان على المحور الساعة 10 صباحا برضه بتوقيت القاهرة

بجد عايزين نقرا كتير اوى

كفاية اننا امة اقرأ