الجوز الخيل

القطط كائنات لطيفة اوى.. يمكن مكانش فيه اهتمام قبل سنة من دلوقتى بيهم
كانت قطط عادية ممكن تعدى فى الجنينة عندنا
اه مرة كنت ارتبطت بقطة فيهم وزعلت جدا لما ماتت.. بس دلوقتى بقت حاجه تانيه
ممكن لو زعلانة او فى حاجه مضيقانى ومجرد ما القطة تيجى وتقعد على رجلى فى عز الليل ... بحسها محتجانى انا وبس
وبحس انها بتكلمنى.. بقعد اشكيلهم واحكيلهم
امبارح انا كنت حزينة علشان القطة الصغيرة كان تعبانه وبجد كانت هتموت
اعتقد لو بنى ادم تعب مكنتش هتأثر اوى كده
بجد انا عيطت بدموع علشانها.. الحمد لله بقت احسن دلوقتى
عسولة اوى وانا بديها الدوا
زى الاطفال الصغيرين وقفلت فمها من المرارة بتاعته:)
دلوقتى وانا بكتب الجزء ده القط الكبير اللى بقاله سنة عندنا طلع على الـcpu ووقع كمان السماعات وبطل الاغانى
ولما جيت اكتب الجملة دى اتحرك شغلها تانى:)
اغنية قصة حبنا لرامى صبرى... تحفة
المهم انا مش قادرة افهم ازاى كائنات لطيفة زى القطط ممكن تجيب امراض وحشة كده
يارب عافينا يارب.. بس هما بجد مسليين ودمهم خفيف جداااااا
----
اثناء قرايتى ليا فى اجنداتى ومدونتى اكتشفت تحسن الحمد لله.. وهو ان الحمد لله بقت حاجات صغيرة تفرحنى
ممكن تقلب المود من النقيض للنقيض.. بقت فيه فرحة
جايز انا اللى بدور على اى حاجه تفرحنى وخلاص.. ما علينا المهم ان الحالة الرخمة دى اتغيرت وبقى فيه فرق
يارب دايما فى فرحة فى كل القلوب
وحاجة تانية وهى ان كانت حياتى وكتباتى متركزة على جزء واحد ومش عايزاها تتكرر بصراحة
عايزة الغى جزء حياتى اللى فات.. الحاجه دى بالذات
مش عايزة كده.. ساعدنى على انها متكونش كده.. ارجع مينفعش الكلام ده
----
مدونتى بجد انتى خففتى عنى ضغط كبير اوى كان مسيطر عليا الكام يوم اللى فاتوا
بعد ما ضاقت بيا الدنيا بالناس اللى فيها.. مكنتش عايزة الحكاية توصل للدرجة دى وبالذات من ناس معينة
انا عارفه انه غصب عنهم.. بس الاسلوب ده صعب معايا اوى والمشكلة انهم مش عارفين نتيجة ده ايه
المهم شكرا بجد ليكى
----