نعود للفضفضه
احم احم
طبعا منا لازم استأذن قبل ما ادخل
المدونة بقت مهجورة اوى مش كده
وكان شكلها كئيب كده
مفيش تجديد
بس لا.... قررنا نحن منى نغير شكلها
ونديها تدوينه جديدة
يلا بقى ان شاالله ما حد حوش
-------
امبارح انا عملت حاجه حلوة اوى
قعدت امص قصب
وعملت حمام زيت لشعرى
وحطيت رجلى فى مايه
من زمان ما عملتش حاجه زى كده او محسيتش انى براحتى كده
------
دايما دايما هى بتكون السبب فى المشاكل
هى مش بتقصد تعمل حاجه بس من كتر ما بتضغط عليا بنفجر فيه هو
وده غلط انا عارفه
------
احنا كبرنا يا ولاد
الدنيا خدتنا اوى
بقى كل همنا العيال
كل اصحابى
اللى عندها طفل... كل فين وفين لما بكلمها
واللى عندها اتنين .... تقريبا معدتش بعرف اخبارها
------
هو انا دلوقتى عندى كام سنة؟؟
26 ونص
يعنى فى نهاية السنة هبقى 27
مش عارفه ليه حاسه مادام 27 جت هتيجى وراها 30 على طول بدون اى سنين فى النص
------
نفسى اشتغل اوى
لانى زهقت من قعدة البيت زائد انى بقيت حاسه انى جاهله اوى ومنعزله عن الدنيا
بس ارجع واقول منا كده مرتاحه واحسن من البهدلة
نفسى رشا لما تكبر تلاقى مامتها حاجه كبيرة كده وتفتخر بها
بس مفهوم ست البيت دلوقتى اختلف مش كده؟
------
مبسوطه انى كتبت فيكى يا مدونتى
بس عايزه كمان بوستات من بتاعة زمان دى وروحها الحلوة
يلا ما علينا
كل سنة وانتو طيبين علشان رمضان والعيد اللى فاتوا ومكنتش معاكم
ولا نخليها للعيد الجاى:D
سلام يا حلوين
Comments
ههههههههههههه
تصدقي يامني وبمنتهي الصدق انتي فيكي حاجه بحس انها تكملة ليه
رغم اني عمري ماشوفتك ولا شوفتيني
بس دايما بحس اننا بنمر اوقات بظروف يمكن تكون مختلفة بس تفكيرنا واحد فيها ونتيجة التفكير تقريبا واحده
انا كمان لسه كنت بفكر اني زهقانة اوي ونفسي يكون ليه دور في الحياة حياة ابني وزوجي وحياتي اللي بقيت احس اني مهملة فيها اوي
نفسي اشتغل
لكن انا مش بحب الشغل او بحب الشغل بس مش بحب الخروج من البيت
لاني القاهرة عندنا هنا الوحده اللي تفكر تخرج تشتغل لازم يكون ليها موصفات خاصة عشان لو وقعت في مشكلة تتصدي ليها بكل شجاعة
وللاسف انا فشلت في ده اكثر من مرة لحد ما قررت في وقت اني مش هنزل تاني ولا اشتغل برة تاني
بس ارجع تاني واقول انا زهقانة
وصعب اني يكون كل دوري في الحياة
اني اعمل اكل وتنضيف
انا عارفة اني كل ده عليه ثواب كبير والله ومش معترضه ابدا عليه
بس عاوزه اعمل حاجه بحبها استمتع بيها احس لما اخلصها اني راضية عني نفسي وسعيدة اني بقدم حاجه لنفسي وغيري
ولسه مستمرة في التفكير ومش عارفه اعمل ايه !!!!!
انا طولت اوي بس بجد موضوع مهم ومحتاج نقاش وحل
تحياتي يامكملة لأفكاري :)
-----------
ده نورك يا جميل
انا بخير الحمد لله
كل سنة وانتى بخير وطيبة
تشكرات كتيرة خالص على زيارتك الكريمة
Eno
----
يا مرحب يا مرحب
ربنا يخليكى يا اينو يارب
عارفه يا اينو
انا بقول انى عايزه اشتغل بس فى نفس الوقت انا خايفه .. الناس معاملاتها معادتش زى الاول
عموما خير وربنا ييسرلنا الامور ويكتب لنا الخير يارب
الف حمدالله على السلامه
عوداً احمد
من الرائع ان يدلل كلا منا نفسه كل فتره
ويكافئها ويشجعها
فمرار الحياه اشد من روعتها ان لم ندعم تلك الروعه
سعيد بقراءه حرفك
بارك الله في ابنتك وبيتك
تحياتى
....
وحشتيني اوي ، منورة مدونتك يا قمر
يعني أنا كمان أغيب أغيب وسبحان الله ألاقي اسمك جه قدامي واقول منى !! ياااه لما اشوفها بتدخل المدونة ولا لأ
وفرحت لما شوفت ليكي بوست من قريب
بجد وحشتيني اوي
:)
يا رب تكوني فكراني انا عبير
Angel love ^_^
-------
الله يسلمك يارب
انا اللى سعيده جدا بمرورك الكريم وتعليقك هنا
نورت وياريت على طول تشرفنى بقراءة كلماتى والتعليق
:)
Aиgel
-------
والله فاكراكى دايما وكل ما ادخل على مدونتك الاقيها لقراء مدعوين
انا متابعه المدونين اللى عزاز على قلبى حتى لو مكتبتش تعليق او كتبت حاجه جديده فى المدونه
انتى وحشانى جدا ومش متخيلة تعليقك ده اسعدنى ازاى وطمن قلبى عليكى
ربنا يخليكى ليا