من 7 لـ 7.... وكمان تاج السعادة

امبارح كان يوم ظريف لطيف وجميل خالص

اتعرفت فيه على انسانة جمييييييييييلة اوى
اتعلمت حاجات كتير حلوة منها
وكفاية ان بداية اليوم بانى اشوف مامتها وهى كمان اللى عرفتنى
كنت خايفة اوى ومترددة انى اعرف حد من عالمى الافتراضى عالم التدوين
بس بجد انا مش ندمانة ابدا بل بالعكس سعيدة جدا
كفاية انها فرحتنى بركوب القطر تانى
لانه كان وحشنى اووووى
واحساس انى اصحى واركب مواصلات الصبح كده رجعنى لايام الدراسة
نفس الطريق ماشية فيه.. بجد احساااااااس تحفة
انا عارفه ان احنا الاتنين حصل لنا موقفين بايخين جدا
بس بجد هى طلعت قوية ومؤمنة .. ربنا يثبتها ياارب وينولها كل اللى فى بالها ويجزيها كل الخير يارب
اما موقفى كان موقف مش ظريف خالص ههههههههه
المهم ان الموقفين دول خلونا نغير الخطة بتاعتنا بدل ما نروح من كفر الشيخ للمنصورة على طول
قررنا العودة بالقطار لمنزل كل منا فقط لمدة ساعة والخروج مرة اخرى ومواصلة اليوم ونكمل اللى اتفقنا عليه
هى وفت بوعدها معايا مع انى لو كنت مكانها مكنتش هقدر اكمل اليوم ابدا
المهم واحنا مروحين فى القطر من فرحتى بجد بمعرفتها كنت شايفة اللون الاخضر كتييييييييير اوى
وكأن بشوف الشجر والسما لأول مرة
مدونتها بجد على اد ما هى جميلة اوى وانا حبيتها فيها
الا ان شخصيتها بجد رائعة والمدونة مجرد جزء صغير خالص فى الشخصية الجميلة دى
اتكلمت معاها عادى خالص وفرجتها كمان على صور شخصية ليا ولاصحابى
مكنتش اعرف انى هتكلم معاها بالطريقة دى
بس كمان ده كان احساسها
الحمد لله
قبل ما اشوفها خالص قلت لها فى نهاية اليوم انا عايزاكى تكتبنى انطباعك عنى ولقيتى فيا ايه مختلف عن مدونتى
وكتبت فعلا وقالت لى اكتبه هنا على لسانها
بس بجد انا افضل انى احتفظ بيه لنفسى

اللى وعدتنى بيه اننا نروح لقاء مدونى الدقهلية
هى عارفه ان انا كان نفسى اروح لان ربنا ما قدرش انى اروح قبل كده
وفعلا رحنا
كان الميعاد الساعة اربعة
لقيت شباب واعى اوى وكلامهم جميل جدا
ومعاهم حسيت انى فيه امل فى بكرة
وبكرة هيكون اجمل ان شاء الله
بس تعرفوا برضه على اد منا فرحانه انى عرفتهم على اد منا خايفة ابعد عنهم
زى ما حصلى مع فريق صناع
انا مش عايزة انكد على نفسى بقى المهم على الساعة خمسة جالى اتصال وكان فيه سبب مقنع اوى انى اروح
الساعة دى عدت بسرعة اوى معاهم بتمنى من ربنا اقدر اكمل معاهم كل اللقاءات
يارب ظروفى تسمح يااااااارب
بس ياريت الميعاد يبقى بدرى عن كده
طبعا استأذنت انا والملاك اللى اتعرفت عليها النهاردة
وكنت مستعجلة علشان السبب
والسبب ده كان منتهى فرحتى كمان
بس قلت لها مادام كل حاجه حلوة كده يبقى اكيد هيحصل حاجه
هههههههههه وفعلا ده اللى حصل
لما روحت ما لقيتش السبب لانى اتأخرت فى الطريق
بس ربنا يخليك ليا يا سبب ويصلح حالك
زعلت انى سيبت اللقاء بدرى ومكملتش معاهم وزعلت ان السبب مشى
يعنى روحت على الفاضى بس برضه مكانش ينفع اتأخر اكتر من كده بره

هبص للجزء المليان من الكوباية
هو اه كان نفسى اعمل حاجات اكتر من كده فى اليوم ده
بس هو كان يوم جميل اوى

عايزين تعرفوا الجميلة اللى اتعرفت عليها لأول مرة
هى منى صاحبة مدونة احاسيس
*
وبمناسبة السعادة اللى كنت حاساها هحل التاج اللى وصلنى من محمد غالية
لانه عن السعادة
بسم الله توكلنا على الله


السؤال الأول:ماهى السعادة من وجهة نظرك؟
السعادة دى شعور جميل ومش بتحسه بس بقلبك لأ دى كل حواسك بتشاركك الاحساس ده
يعنى انا امبارح عنيا كانت شايفة كل حاجه جميلة

السؤال الثانى: كيف تصل إلى السعادة؟
اقدر اوصل للسعادة بالرضا وانا اللى ادور على الاسباب اللى تخلينى سعيدة مش استنى هى اللى تجيلى لحد عندى

السؤال الثالث: هل السعادة وهم أم أنها حلم صعب؟
لا هى وهم ولا حلم صعب
هى محتاجه قلب مستعد للفرحة

السؤال الرابع: هل السعادة طريق للنجاح ؟وضح؟
اكييييييييييد هى طريق للنجاح
يعنى مثلا انا لما بكون مبسوطة مش هيكون عندى امل وطموح انى اعمل كذا وكذا وكذا صح ولا ايه؟

السؤال الخامس: ماهى أكثر اللحظات التى شعرت فيها بالسعادة؟
كان فى رمضان 2003 حاجه كده بينى وبين ربنا ونفسى احسها اوى تانى
ولما كمان ابص فى المراية واحس انى ربنا راضى عنى وانا راضية عن نفسى
وكمان لما اكون السبب فى فرحة اى حد قريب منى

السؤال السادس:هل ممكن أن تحقق كل شىء؟
ان شاء الله انا متأكدة
وعلى فكرة فى حاجات كتير ربنا حققهالنا بس الشيطان بينسيهالنا
لو كل واحد فكر كده مع نفسه هيلاقى فعلا ربنا عملنا حاجات كتير كان نفسنا فيها
يعنى ممكن نستعين بالله ونتوكل عليه ونحقق كل حاجه نفسنا فيها

السؤال السابع: السعادة تجعلك تقبل على الحياة أم لا؟
طبعااااااااا بتخلينى اقبل على الحياة

السؤال الثامن: هل أحسست يوما انك وصلت لقمة السعادة؟
الحمد لله فى لحظات كتير

السؤال التاسع: لماذا تمر أوقات السعادة بسرعة؟
هههههههههههه مش عارفه بس هى فعلا بتخلص بسرعة اوى

السؤال العاشر: هل ترى السعادة فى التدين؟
اه طبعا بس مش تشدد
وافتكرت اغنية الطريق الصح
عارف ليه بيجيلنا امل دايما ويروح كالعادة
فاكرين الطريق الصح مافيهوش سعادة

السؤال الحادى عشر: هل أنت متفائل وعندك أمل؟ وضح؟
الحمد لله رب العالمين ولولاه مكنتش بتنفس لحد دلوقتى

السؤال الثانى عشر: إذا شعرت بالحزن ماذا تفعل؟
احاول اغير المكان
اكتب اللى جوايا
وطبعا كلام ربنا فوق كل شئ لان بذكر الله تطمئن القلوب

السؤال الثالث عشر: هل يستمر معك الحزن فترة ام ينقضى فى الحال؟
على حسب لو نفذت اللى يبعدنى عن الحزن فى السؤال اللى فات

السؤال الرابع عشر: ما رأيك فى الأفراد المتشائمين؟
والله ساعات بحس ان عندهم حق
لان انا ببقى متشائمة فى بعض الاوقات
بس بجد مفيش مجال لنا اننا نتشائم
ربنا جميل وكريم وحليم وغفور وقادر
ويارب ثبتنا ويسعدنا دايما
*
واليكم ما قاله بعض العلماء والحكماء عن السعادة

السعاده في سمو النفس إلى خالقها عز وجل "ابن الطفيل"
أن سكينة النفس ولاريب هي الينبوع الأول للسعاده "د.يوسف القرضاوي"
لايستطيع الإنسان أن يرى السعاده بغير نظارة الحب "ميخائيل نعيمة"
أسرار السعاده ثلاثه المال ثم المال ثم المال! "فولتير"
تصرف كما لو كنت سعيدا وسوف تحس ببعض السعاده "وليم جيمس"
السعاده هي الخير "الفارابي"
لايقلق من له أب فكيف من له رب؟ "محمد متولي الشعراوي"
إذا أرشدت إنسانا إلى حب القراءه فقد جعلته سعيدا "هيرستر"
عندما نجمع الكتب فإننا نجمع السعاده "فنسنت ستاريت"
البيت بنك السعاده "مثل انجليزي"
يسعد الرجل بمصاحبة الرجل السعيد "علي بن أبي طالب رضي اله عنه"
العباده هي السعاده "محمد الأنسي"
السعاده هي الإعتدال "أرسطو"
عقبة كبيره بطريق السعاده :إنها توقع سعاده أكبر "مونتاين"
من لم يجرب الألم يجهل قيمة السعاده "مثل تركي"
السعاده تولد من الشقاء والشقاء يختبئ في قلب السعاده "لاوتسو"
فن النسيان سعاده "مثل اسباني"
لايجلب العمل السعاده دائما ولكن لاسعاده بلا عمل "مثل انجليزي"
السعاده زورق مبحر في إتجاه ملائم لريح "مثل صيني"
السعاده في نفس الإنسان..وحوله وتحته ولديه "إيتيين"
السعيد الذي يحب مالديه ويقنع بما بين يديه "بول دومر"
التسامح روح السعاده "نابليون بونابرت"
السعاده هي أن يكون عملك هوايتك وزوجتك حبيبتك "مثل عالمي"
السعاده كره نجري خلفها حين تتدحرج،ونركلها حين تقف "شاتو بريان"
عندما تسعد الآخرين تسعد نفسك "بنجامين فرانكلين"
السعاده عطر لاتستطيع أن تعطر به غيرك دون أن يصيبك "إيمرسول"
السعاده ثمره لشجرة الصبر "أفلاطون"
السعاده ضمير نقي ونفس هادئه وقلب شريف "المنفلوطي"
لاربيع دون شمس ولا سعاده دون مشاركه "مثل يوغسلافي"
صلاة الليل بهاء النهار "علي بن أبي طالب رضي الله عنه"
السعاده :صحة المزاج "أفلاطون"
العيش كله بالجليس الصالح "المهلب بن أبي صفرة"
أهم ركن بالسعاده راحة البال والدين يحقق راحة البال "أحمد أمين"
السعاده في أداء الواجب "ستيوارت"
من أكبر أسرار السعاده أن تكون على وفاق مع ذاتك "مونتيل"
السعاده إصلاح الذات "جان جاك روسو"
الفضيله وحدها هي السعاده "شكسبير"
للسعاده شرطان:عقل صحيح، جسم سليم "لوك"
أجمل وأسهل وصفه للسعاده هي شكر الله "عبدالله الجعثين"
السعداء هم اللذين يعرفون كيف يضحكون "مصطفى أمين"
ماأسعد من يستطيع النهوض من بحر الأخطاء "جوته"
السعاده هي إنجلاء الغمرات "عمرو بن العاص"
الرجل السعيد هو الذي يعمل من أجل التعساء "مصطفى أمين"
جربت كل طرق السعاده فوجدت أكثرها أمانا طريق المرء لبيته "اليزابيث هاملتون"
الإبتسامه الرقيقه زورق حالم يسير نحو شاطئ السعاده "بيرون"


الحمد لله رب العالمين
ملحوظة نونو
معلش على تأخيرى عليكم ومتابعتكم
انا عارفة انى مقصرة جدا
سامحونى