قلق+توتر+خوف+بطالة+.....+.....=؟؟؟؟؟؟

السلام عليكم ورحمة الله وبركاته
عنوان يخض مش كده؟؟؟
الاول الحمد لله الذى هدانا الى هذا وما كنا لنهتدى لولا ان هدانا الله
يـا رب انا مش معترضه على حاجه والله
بس انا تعبانه اوى
هفضل عايشه لامتى فى قلق وتوتر
قبل ما اتخرج كنت عايشه فى توتر وكلنا عارفين قلق الامتحانات ولما خلصت امتحانات .. عشت فى قلق انتظار النتيجة.. بعدها قلق البطالة
اسوأ مرحلة فى حياتى من مايو 2006 لما خلصت الكلية بتاعتى وكنت فاااااااااااااضيه- احساس بشع جداااا- طول عمرى كنت بخرج وكنت بروح كورسات .. غير فريق صناع
وفجأه كل ده راااااح
تعبت جدا الفترة دى (الحمد لله رب العالمين انها عدت على خير)بس الأثار اللى نتجت عنها لسه تعبانى لغاية دلوقتى
بدأت روحى ترجعلى لما اشتغلت مدرسة كمبيوتر بالمكافأة20/11/2006 مع العلم ان تخصصى انجليزى.. بس انا قلت اهو شغل والسلام.. وكانت كمان البلد بعيدة اللى فيها المدرسة.. قلت عادى برضه.. دفعت اد اللى اخدته مرتين.. وكان اول قبض ليا 60 جنيه شهر وعشر ايام .. ومش هقول على البهدله اللى كنت بتبهدلها علشان اخدهم .. كنت اجيب استمارة قبض من اى مكتبه واملاها من المدرسة وبعدها اروح للموجه بتاعى يمضى عليها وبعدها اروح الادارة والف الـ 6 أدوار كلها علشان امضى كام توقيع عليها وبعدها اصبر اسبوع ولا اتنين ويمكن اكتر بكتير واروح اسأل ياترى الشيك وصل ولا لاء .. وصل الحمد لله اخده شيك قيمه وسيما بـ60 جنيه بحالهم واروح اصرفه من البنك... يا سلااااااااااااااام تخيلوا بقى كم المواصلات اللى باخدها فى الحكايه دى كلها غير التوتر والذل اللى كنت بشوفه.. وانا بجد ما بقدرش استحمل حاجه واقل حاجه ممكن اعيط منها وده حصلى كتير اوى اوى
خلصت السنه المكافأه دى شهر ابريل 2007 .. لقيت الحكاية مش جايبه همها.. قلت اقدم فى مدرسة خاصة .. وقد تم
واستلمت الشغل شهر مايو 2007 واشتغلت بقى المرة دى مدرسة انجليزى وكمبيوتر وبنفس راتب المدرسة اللى بتدرس مادة واحده.. عاااااااااااااادى خالص.. كنت بدى لاولى وخامسه ابتدائى انجليزى وسادسه واولى وتانيه وتالته اعدادى كمبيوتر.. كنت ببذل مجهود جبار بجد وكنت تعبت بس قلت لا لازم استحمل مش احسن من القعده فى البيت
اتخطبت شهر سبتمبر 2007 لقيت بابا بيقولى مش انتى كنتى عايزة تاخدى السنه التربوى.. ممكن تاخديها السنة دى علشان لو حصل وسافرتى مع جوزك تعرفى تشتغلى بره بسهولة.. وفعلا قدمت يوم30 سبتمبر وكان اخر يوم تقديم تقريبا.. وكان اول مرة فى حياتى اركب القطر... كنت فرحانه بالتجربة الجديدة دى... الدراسة بدأت متأخر مش فى اول السنه على اساس اننا دراسات عليا... قلت ان شاء الله هخلينى فى الشغل برضه وان شاء الله ربنا يقدرنى واقدر اذاكر واشتغل فى نفس الوقت... للاسف لقيت ان السنه دى محتاجه حضور علشان درجات اعمال السنه وكمان بننزل عملى فى المدارس .. والدبلومة ما كانتش فى المنصورة دى كانت فى كفر الشيخ ومحتاجه ساعتين سفر رايح وساعتين رجوع يعنى مش هينفع الشغل مع الدراسة
سيبت الشغل 20/11/2007 ... سبحان الله نفس التاريخ اللى استلمت فيه الشغل السنه اللى فاتت... الحمد لله عملت اللى عليا وزيادة فى الدراسة وتعبت جدا .. شفت كتير اوى .. بس الحمد لله خلصت على خير وخلصت امتحانات من شهر تقريبا بس دلوقتى انا فى انتظار النتيجة
انا عارفة انى تعبت اوى وان شاء الله ربنا مش هيضيع تعبى ده وهيجازينى بتقدير عالى ان شاء الله ... بس اعمل ايه فى نفسى برضه خايفه وقلقانه... النتيجة ظهرت فى الكنترول من اول شهر 8 سايبنها ليه فيييييييه من يومها؟؟؟ ناس كتير جابوها وجايبين جيد جدا ماشاء الله ... قلت تمام خير الحمد لله
كان ليا واحده صاحبتى عرفتها من كفر الشيخ واتجوزت فى اول 8 قلت اكلمها واباركلها النهاردة .. قالت لى عملتى ايه فى النتيجة .. قلت لها مش هى لسه فى الكنترول .. قالت دى ظهرت من يومين فى الكلية.. طيب عملتى ايه يا حبيبتى.. شلت تربية مقارنة... الله امال ايه التقديرات اللى بسمعها دى يا جماعة.. قالت ده ناس كتير شايلين مواد... الله يرحم ايامك يا جامعة المنصورة .. كنت بجيب النتيجه من سكات من على النت ولا انى اروح الكليه واجيبها.. انا هروح بكره ان شاء الله علشان اشوفها.. ربنا يستر بقى.. يارب نرجع فرحانين بكره بتقديراتنا يـــــــــــــــــا رب

مش عارفة انا كتبت ده كله ليه.. بس مشاعر ملخبطة جوايا
وخايفه اوى من بكره
مش عارفه انا هشتغل ولا لاء... لما رحت المدرسة الخاصة من يومين ما حسيتش الترحيب بتاع السنه اللى فاتت... انتو فاهمين نظام فوت علينا بكره.. ان شاء الله هنتصل بيكى على اول الدراسة... ربنا يستر بجد... هو انا هفضل فى القلق ده لحد امتى؟؟؟؟؟
اخلص من موضوع يطلع موضوع غيره
تعبااااااااااانه اوى
خايفه من البطالة.. اذا كنت انا بنت وعامله كده امال ايه حال الولاد؟؟؟ الله يكون فى عونهم يارب
كنت قريت عندنا فى مادة "تربية ومشكلات المجتمع" عن مشكلة البطالة وكانت بتقول.... ان العاطل المتعلم اكتر خطورة من العاطل غير المتعلم، فغير المتعلم أقدر على التغلب على بطالته من المتعلم. فالشباب المتعلم تنمو لديه طموحات يحاول تحقيقها من خلال العمل أو الاستقلال الاقتصادى فالعمل ليس مجرد طريق للحصول على الاجر بقدر ما هو توفير شروط الصحة النفسية، فالبحوث النفسية الحديثة تكشف عن اثار اساسيه ثلاثة للبطالة:-
1- ضياع معالم الجدول الزمنى للحياة اليومية.
2- ذبول نسبة كبيرة من شبكة العلاقات الانسانية.
3- النمو السرطانى لمشاعر الخواء الشخصى.

كل الكلام ده صح 100% ومريت بيه... يبقى ايه الحل؟؟؟
بس بجد حل المعادلة دى ايه؟
قلق+توتر+خوف+بطالة+.....+.....=؟؟؟؟؟؟
ياترى هيبقى فيه لسه جوانا أمل؟
والله سمعت من شاب خاطب المفروض... قال انه مش عايز يتجوز.. ليه يا بنى؟؟ خايف من المسؤلية.. ازاى انا هتعب بنت الناس معايا؟؟
زهقت خلاااااااااااص وعلى أخرى .. يارب يسرها من عندك.. والله ما لينا غيرك

لو فهمتو اى حاجه من اللى كاتباه يبقى كتر خيركم لانى انا مش فاهمه حاجه
بس ادعووووووووووولى وللمسلمين اجمعين
__________________
تحديث
الحمد لله نجحت وجبت جيد جدا وكمان اصحابى
بس حسبى الله ونعم الوكيل قتلوا فرحتنا لما قالوا انه مينفعش ناخد إفادة بالنجاح والشهاده بعد العيد
يعنى ضاع علينا تقديم الادارة السنه دى

Comments

ربنا معاكى ياااااااااااارب
انتى متخافيش وخلى عندك حسن ظن بالله
وان شاء الله خير ياحبيبتى
روقى كده واهدى وابقى طمنينى بقى ماشى
بقولك صحيح انتى مش مشتركه فى جروب مدونى الدقهيله على الفيس بوك ليه؟ ولا انتى مشتركه بس انا مش لقياكى؟
عاوزاكى تشتركى بقى ونبقى نروح اللقاءات سوا لانى بصراحه بكسل وبكتئب وبفضل قاعده فى البيت وخلاص
روووقىىى ان شاء الله خير
Eno said…
ربنا يطمن قلبك
وتفرحي بالنتيجه صدقيني خوفك ده ان دل علي شئ يدل علي انك تعبتي

(وان الله لا يضيع اجر من احسن عملا )
ولا ايه ؟؟

اطمني وثقي اني ربنا قادر علي كل شئ وانك تعبتي وتستحقي النجاح

ارجوكي ابقي طمنينا عليكي

ان شاء الله كل خير :)
تحياتي
mahasen saber said…
ربنا يطمنك ويطمنا عليكى ان شاء الله ويكلل تعبك بكل خير ...عارفه انا حاسه بكل حرف انتى كاتباه لانى عشت الى حد كبير جزء من التجربه زيك كده ودلوقتى بشتغل شغل مش اصلا طموحى ولا هدفى بجانب انه المرتب 143 زى اغنية ابو جريشه بالضبط وياما بابا قالى سيبى الكلام الفاضى ده بس انا اليى مخلينى متمسكه بالشغل هيا الجدول الزمنى دى متتخيليش فرحتى وانا بصحا الصبح واشوف ابنى ومتطلباته واجرى اروح الشغل بسرعه عشان الحق الامضا مع انى بصرف ضعف المرتب مواصلات بس اكتشفت ان الاشباع النفسى وملئ الفراغ حاجه لا يمكن العيش بدونها ناهيكى انى بقدر اخد ابنى معايا ونقضى اليوم مع بعض والحاجه اليى مصبرانى ان الشغل ده هو افضل حاجه بالنسبه للمكان اليى انا فيه ...حاسه بيكى يا some وربنا يوفقك ويحققلك كل اليى بتتمنيه واصبرى واسعى واعرفى فى النهايه ان اليى هيصيبك هو بألتاكيد نصيبك...اتمنالك كل خير ويا رب اكون قدرت اخفف عنك شويه...فى رعاية الله وامنه..عايزه اتطلق و..
funckydoctor said…
ايه دنيا
سعادتك مش بس اللى كده
فى زيك كتيير أهم حاجة العزيمة لو يأست يبقى فعلا انتصر الدهر عليكى
انتى عملتى خطوات كويسة واجنهدتى تعبك عمره ما هيضيع
وابقى طمنينا على النتيجة
وصبح صبح من جو النكد ده :D
عارفه كانى بسمع اختى تتكلم

نفس الحوار بالظبط

بس يسهلها على الجميع ياااااااارب
mahasen saber said…
الحمد لله مليون مبروك شوفتى ان الله لا يضيع اجر من احسن عملا..وانتى كنتى بتكافحى الحمدلله والف مبروك انا حاسه بفرحتك وسعيده ليكى قوى قوى ..اختك محاسن ..عايزه اتطلق و..
Eno said…
لولولولولولي

الف مليون مبرررررررررررررررروك يامونش

المهم انكم نجحتو وان شاء الله تلحقو السنه الجايه التقديم :)
وتكوني كمان في بيتك :)

الف مبروووووك :)
الف مبرررررروك ياقمر
ومعلش متزعليش نفسك المهم نجحتى متنكديش على نفسك بقى ياجميل
الف مبرررروك مره تانيه :)
Mona Shereif said…
نوسه
------
الله يبارك فيكى يا نوسه
وحاضر انا مش هنكد على نفسى
هحاول افرح على اد ما اقدر
وهمسك فى الفرحه بإيدى وسنانى
ربنا يخليكى يا قمر وييسر امورك ان شاء الله
Mona Shereif said…
Eno
-----
الله يبارك فيكى يا حبيبتى
وان شاء الله ربنا هيحلها وبإذن الله هشتغل السنه دى وكمان هلحق التقديم ويارب يارب يارب اكون فى بيتى بجد
يا سلام على دعوتك دى
هههههههههههههههههه والله قلتها لماما من فرحتى بيها
ويارب انتى كمان يجمعك انتى وفوكس على خير اللهم امين ويبعد المشاكل عننا كلنا يارب
نورتينى والف شكر لمتابعتك ليا
Mona Shereif said…
mahasen saber
--------------
اكيد طبعا خففتى عنى
والله فرحت لما لقيت حد حاسس باللى بمر بيه
وكفايه انك متبعانى وعايزه تعرفى اخبارى ده مفرحنى جدااااااا كمان
وبجد حسيتك اختى
الحمد لله رب العالمين
الله يبارك فيكى ويحققلك كل اللى تتمنيه ويبارك لكى فى ابنك ان شاء الله
وفعلا والله احساس انك تشتغلى ده احساس حلو اوى بالتغاضى عن المشاكل اللى بتقابلنا واللى بنحس بيها اثناء الشغل .. بس انك تحسى انك عايشه وبتعملى حاجه احساس رااااااااااائع
نورتينى واسعدتينى
Mona Shereif said…
funckydoctor
--------------
انا عارفه ان فى زيى كتير والله
وعلشان كده حاسه انى معملتش حاجه
بس اهو انا بعمل اللى عليا وان شاء الله خير
ويارب مفيش حد ابدا يحس بيأس
نورتنى بزيارتك الكريمه
منى said…
مبروك كبيره اد الدنيا
ربنا يسعدك دايما يا حبيبتى
على فكره ممكن تلحقى تقديم الاداره بعد العيد برضه
او تشوفى مدرسه خاصه تانيه
محدش عارف الخير فين
ربنا يوفقك
تحياتى
Mona Shereif said…
بطوط حبوب
-----------
ههههههههههههههههههههه
والله فرحتنى يا بطوط
ربنا ييسر لها امورها ان شاء الله
وعلينا كلنا يااااااااااااارب
منورنى
Mona Shereif said…
منى
----
الله يبارك فيكى يا منمونه
كتير خالص اد الدنيا
يارب ان شاء الله الحق اى حاجه السنه دى يا منى.. اكيد انتى حاسه بيا
يارب يسعدك انتى كمان يا روح قلبى
نورتييييييينى خاااااااالص
السلام عليكم
نقول فى هذه المدونة الطيب أهلها

استعينى بالله القوى
ولا تنسى الدعاء الخفى
واستمسكى بالخلق المزى
ولا تقنطى من الجتمع الردى
واستعملى الفكر السجى
ستجدى الرغد الأبدى


اتمنى لك كل السعادة
الحقيقية


بالمناسبة
ستجدى عندى كلاما لك
فى مدونتى
اظنه سيريحك
Mona Shereif said…
ياقوت
--------
الله
السعادة الحقيقية
ربنا يكرمك ان شاء الله
ماشاء الله على كلامك
جزاك الله خيرا
momken said…
الف مبروك النجاح

وبعدين موضوع ستين جنيه ده بجد
دانا كنت فاكر الراجل بتاع 145 جنيه بيهرج
بس معلش ربنا يجعله فى ميزان حسنتك

وبعدين انتى ليه واقفه مش بتبحثى ليه فى القطاع الخاص
سيبك من الحكومه والمدراس
انتى ليكى فرص كتير خصوصا فى المراكز التعلميه لو انتى متمكنه من الانجلش بتاعك

على العموم الف مبروك النجاح مره تانيه
لا يضيع الله اجر من احسن عملا

انا اصلا كنت جاى اقولك كل سنه وانتى طيبه

تحياتى
Mona Shereif said…
momken
---------
الله يبارك فيك
وياسيدى موضوع الـ 145 جنيه مظبوط
طيب والله كان مرتبى فى المدرسة الخاصة كمان 150 تخيييييييييييل؟؟؟
ما علينا
وبالنسبة للقطاع الخاص
نظرا لانى عايشه فى قريه فالمجالات دى مش متوفرة اوى يعنى
انا كنت طبعا بدور على المثاليات وازاى انى استخدم الانجليزى بتاعى كويس وانى امارسه صح وان التدريس مش هيخلينى امارسه بالطريقه اللى ترضينى
بس لقيت كل دى احلااااااااااام
الحمد لله رب العالمين على كل حال
وان شاء الله خير

كل سنه وانت طيب يارب
جزاك الله كل خير
نورتنى
الحمد للة ان انتى نجحتى.. انا ماشى مع البوست من الاول.. يا واد هتقول اهية هتقول اهية
اخيييييراا قولتيها يا شيخة
اولا الف مبروك.. يا عم التقديرات الجامدة مش احنا الفشلة
ثانيا بقة.. يا بنتى انتى بنوتة يعنى بالنسبة لك الشغل كماليات.. عارف هتقولى لى امال انا اتعلمت لية وعاوزنى اقعد فى البيت
لا انا مش قصدى كدة.. انا قصدى بالراحة على نفسك شوية واهدى وبلاش كل التوتر دة.. ايزى حبتين.. انتى مستعجلة على اية.. امال الشباب اللى بالالاف يعملوا اية؟؟؟
بالراحة كدة.. حبة هدوء.. وان شاء اللة طموحاتك كلها هتتحقق
السلام عليكم

نقول فى هذه المدونة الطيب أهلها

هل انقشع الضباب

؟
أم نزل المطر

؟

زادك الله عزة بنفسك
وثبتك فى الدنيا والآخرة

استمرى
وأنتظر بوست جديد
Mona Shereif said…
صباح الصباح
------------
الحمد لله طبعا
هههههههههههههههه معلش اصل انا كنت متضايقه قلت اقول اللى فى قلبى كله بدل ما اموت
الشغل بالنسبه ليا حياه
مش علشان اتعلمت دده كله والكلام ده
وانا قلت انى تعبت نفسيا لما قعدت حوالى6 شهور من من غير ما اشتغل
عموما ربنا ييسرها من عنده
الف شكر على الزيارة الكريمه
نورتنى
Mona Shereif said…
ياقوت
-------
الحمد لله رب العالمين المعنويات مرتفعه دلوقتى واحسن من الاول بكتير
الف شكر ربنا يكرمك
وان شاء الله فى بوست جديد فى السكة
نورتنى
طاب ماو التحديث فيه أخبار لوووووووز أهووووووو

هههههههههههههههههههه
بس مش لوز أوي

بصي اتعلمي تمشي بمبدأ
قل لن يصيبنا الا ما كتب الله لنا
يعني لما ما يدوكيش افادة النجاح متزعليش لان مكتوبلك متقدميش ادارة
وبعدين بصي ليها من ناحية تانية
انتي الحمد لله نجحتي
مش أحسن ما كان بعيد الشر حصل حاجة
اتعودي تبصي للجزء المليان من الزجاجة مش الفاضي
وخلي عندك ثقة في ربنا أكبر وحبي نفسك واللي حواليكي أكتر ودايما خلي عندك أمل
هتلاقي ربنا بيحبك أكتر وأكتر وأكتر
Mona Shereif said…
dr.mohammed gohary
------------------
منورنى يا دكتور
حاضر هبص للجزء المليان
الحمد لله رب العالمين على كل شئ طبعا
الف شكر على الزيارة
ربنا يوفقك يارب

Popular posts from this blog

الجوز الخيل

ارادة الله لا قرارى

اذن يا بلال