اول تاج فى حياتى البلوجاتية

اول تاج فى حياتى البلوجاتية
من اينو

اولا : اذكر عشرة اشياء عن نفسك
ثانيا : اختار خمس اشخاص تهدي لهم التاج 
ثالثا : لاتهدي التاج لمن اهداه اليك 
رابعا : عرف اللي بعتلك التاج انك نزلته عندك

اولا : عشر حاجات عن نفسى
الصراحة اجابته صعبة جدا
بس سمعت مقولة بتقول ( لاتبحث كثيرا عن نفسك فهى تصرفاتك ) يبقى هنتكلم على تصرفاتى وانتم بقى تحكموا ونشوف رأيكم ايه
1- بزعل بسرعة جدا من اى حد ومن اى حاجه، هنقول حساسه هنقول هبل بس اهو بقى انا كده ومش عارفه ليه
2- بحب الناس اوى واحس فيهم الخير، بس بخاف جدا لو شفت اى حاجه بتظهر مساوئ وجشع وظلم الناس وارجع واقول الحمد لله الذى عافانى 
3- ناس كتير بتقول عليا طيبة لدرجة انى كنت اتخنقت من كلمة طيبة دى لانها كانت اتقالت لى فى يوم اكتر من 10 مرات من 10 اشخاص مختلفين فبقول الحكاية دى لواحدة صاحبتى فقالت لى ولا تزعلى يا ستى انتى خبيثة، لقيت الكلمة وحشة جدا وقلت مالها الطيبة يعنى احنا كده عال وفل الفل
4- ممكن ازعل الناس واجرحهم بس بيبقى من غير ما اقصد والله وبندم جدا من كده ونفسى اتخلص من الموضوع ده
5- اكتشفت مؤخرا انى رومانسية جدا مع ان مش باين عليا خالص والله
6- ساعات احس ان عندى طموح عالى اوى وانى اقدر اهد جبال وساعات تتملكنى حالة من اليأس والملل وابقى خلاص على تكه واعيط وفعلا بعيط كتير وده ينقلنا على النقطة اللى بعد كده وهى.............
7- نكديه من الدرجة الاولى بعيط فى الفرح وفى الحزن
8- شكلى بيبقى مكشر دايما، لدرجة الناس بتقابلنى فى الشارع تقولى زعلانه من ايه يا انسه؟ انتى يا ابله يا اللى زعلانه متكشريش كده، وما الى ذلك مع انى والله بضحك كتير جدا وكان فيه مدرس عندى فى ثانوى سألنى مره انتى بتضحكى كتير كده ليه؟ والله انا بقيت محتارة هو انا مكشرة ولا مبسوطه ههههههههههههههههه
9- احب اعرف رأى الناس فيا ويقولولى عيوبى قبل مميزاتى مع انه هبل وعبط وانا عارفه ان مفيش حد ممكن يقولك عيوبك فى وشك كده، اه ممكن يقطع فروتك من وراك ده العادى اصلا
10- اى كلمة صغيرة ممكن تأثر فيا ولو كنت زعلانه من حد وبجد رد عليا بكلمه بسيطه اوى بس ريحتنى بنسى كل اللى فات يعنى الحمد لله بروق بسرعة وبنسى بس عمرى ما بنسى اللى بيجرح كرامتى ابدا

وفى الختام احب اقول

الف شكر يا اينو على التاج ده ربنا يخليكى ليا
(على فكرة انا حبيت البنت دى جدا) محدش يقولها بقى اتفقنا؟


ثانيا : اختار خمس اشخاص تهدي لهم التاج 
اهو دلوقتى هعيط لانى مش هعرف احط اللينكات بتاعة المدونات والناس اللى هديلهم التاج ، علشان انا معنديش شريط تنسيقات اصلا، وتلاحظوا انى عمرى ما حاولت انسق الموضوع ولا احط صورة ولا الون الخطوط لانى مش لاقيه شريط تنسيقات عندى مش عارفه ليه؟ اشمعنى انا يعنى
عموما اول خمسه يردوا على البوست ده بهديلهم التاج واجبارى بقى يجاوبوا عليه ومتتكسفوش بقى وتقعدوا تعزموا على بعض 

وزودوا العيار حبتين الله يكرمكم ويرضى عليكم
وادعو كتير بقى دلوقتى انا بمتحن امتحانات اعمال السنه والعملى
الدعاء بظهر الغيب
وحشتونى
السلام عليكم ورحمة الله وبركاته
************
تحديث
-----
هاااااااااااااام وعاجل الى كل من:-
wael 
وومن 
shirry
سفينة 
أبا يحيى وادم

فقد تم تمرير التاج لهم حيث انهم كانوا الخمس الاوائل فى التعليقات
و دمتم

Comments

Eno said…
اجابات حلوه اووووووووووووي
واحب اعرفها عنك لاني حبيتك في الله والله :)

مرسي اووووووووووي علي الكلام الجميل ده ربنا يبارك فيكي مرسي (ورده)

ربنا ينجحك يامونش ويقدملك كل اللي فيه الخير ليكي ااااااااااااميين :)

انا مش ينفع اخد التاج عشان انا جاوبت عليه :))

سلام ياقمر :)
منى said…
نتيجه التاج ده
انك تلقائيه جدا
وبتتصرفى باحساسك

ربنا يوفقك فى الامتحان ويهديكى لما يحب ويرضى
انا كمان جاوبت التاج ده
تحياتى
wael said…
التاج ده انا قريته عند ناس كتير بس اكتر حاجه تميزتي بيها هي الطبيعيه والشفافيه في كلامك
وعلى العموم ربنا معاكي ويوفقك في امتحاناتك
sometimes
مدونتك جميلة جدا وتلقائية جدا جدا وبتتكلمي عن نفسك بنتهي الصراحة والوضوح انا عن نفسي لو حد ممررلي التاج مش هاعرف اجاوب علية
تحياتي
shirry said…
انا شفت التاج دا كتير بس بجد لما شفت اجابتك حسيت انك شخصية عسولة اوي وتلاقيئة جدا وشفافة اوي

ربنا معاكي في الامتحانات
شدي حيلك
my dear sometimes
رجلك خدت علي مدونتي ودي حاجة مخلياني في منتهي السعادة طبعا
ثانيا انا بقولك sometimes علشان معرفش اسمك
ثالثا موضوع لعبه المذاكرة دي تجنن وياربت تدعلي وادعيلك واحتا الأتنين ندعي لكل اللي بيمتحن
مودتي وتحياتي
سفينة said…
ربنا يوفقك يارب في المذاكره والامتحانات وفي كل حياتك
وعلي فكره انتي شخصيه جميله قوي
اتمني لك كل خير واتمني تشرفيني بزيارتك دايما
خالص تحياتي،واطيب تمنياتي بالنجاح والتوفيق
rtrcbh said…
السلام عليكم ورحمه الله وبركاته
كانت تلك زيارتى الولى لمدونتك
ان شاء الله المرات القادمه اجد لديك مفيد ومزيد من الماضيع
لانى لم يحالفنى القدر بموضوع جديد لك
ان شاء الله لن تكون زيارتى الاخيره
وجزيتم خيرا ووفقكم الله
د/ابا يحيى وادم
على فكره انا اول مره اعلقلك

انا استشاريه نفسيه واسمحيلى احاول احلل شخصيتك من خلال كلامك
واضح فعلا انك انسانه طيبه وده من كلا م الناس عنك
والطيبه دى مش حاجه وحشه بالعكس دى تدل على الشفافيهوادراك الامور من الوهله الاولى
بس رجاء حاولى ما تخليش الطيبه دى تأثر على عدم التمييز بين الشخص اللى معدنه جيد من الشخص اللى معدنه سىء

واضح انك بتقدرى تكتشفى عيوبك
يعنى بتقولى انك بتجرحى الناس من غير قصد
وفى الموضوع دا حاولى تفكرى ف كلامك قبل ما تقوليه
عشان متجرحيش حد
ولو صادف وجرحتى حد حاولى تفهميه قصدك وانك متقصديش جرحه

واضح كمان انك من النوع اللى بيلوم نفسه كتير عشان كده بتعيطى كتير
وده ف حد زاته نعمه من عند ربنا ان يكون عندك نفس لوامه
وصدقينى انتى مش نكديه ولا حاجه انتى حساسه بس
والحساس ده دموعه بتبقى قريبه قوى

وكون انك بتضحكى كتير وتبكى كتير ف ده ان دل يدل على توازن الشخصيه

واخيرا وليس اخرا
كونك تقدرى تعبرى وتتكلمى عن نفسك ف دى ف حد ذاتها ملكه
تتميزى بيها

احييكى
واضح انك طيبة جدا
أولاً
متشكر على زيارتك ليا ودا أسعدني جدااا

ثانياً
أنت بجد إنسانة بكل ما تحمله الكلمة من معنى بعيوبها ومزاياها وأعتقد إنك متصالحة مع نفسك

ثالثاً
موضوع لعبة المذاكرة أكثر من رائع ويارتني كنت قريته ايام الدراسة كان هيفرق معايا كتير

تحياتي
سفينة said…
ميرسي قوي ياقمر علي التاج ده
وعلي فكره انا قبلته واتمني اشوف تعليقك عليه قريب
وربنا يوفقك في الامتحانات وفي حياتك كلها يارب
سلااااااااااااام
السلام عليكم ورحمة الله وبركاته

إجابات جميلة وصريحة

ربنا ويفقك في غمتحاناتك وحياتك


تحياتي
منى said…
انتى فين من زمان؟
اكيد امتحانات
ربنا يوفقك
تحياتى
انتى جميلة اوى ع فكرة مش مشكلة حكاية العصبية بس المهم تتغلبى عليها


تعرفى فيكى منى كتيير


عزماكى عندى ع العصير وكل اللى يحب يفرفش يتفضل معزوم هو كمااااان

بييييييس

Popular posts from this blog

الجوز الخيل

ارادة الله لا قرارى

اذن يا بلال