My photo
I'm a girl who lives sometimes in a good mood and sometimes oh in a very very bad one

Sunday, January 25, 2009

من يومين فاتوا

ـــــــــــــــــــــــــ
ــــــــــ

Tuesday, January 20, 2009

هو المجنون بيقولوا عليه مجنون ليه؟؟؟؟

حاسه انى متضايقه
يــــــــــــــــــــا رب
يارب إن عظمت ذنوبي كثرة = فلقد علمت بأن عفوك أعظم
إن كان لا يرجوك إلا محسن = فبمن يلوذ ويستجير المجرم
أدعوك ربي كما أمرت تضرعا = فإذا رددت يدي فمن ذا يرحم
مالى إليك وسيلة إلا الرجاء = وجميل عفوك ثم أني مسلم
اضغط للتحميل

أولا ... ثانيا... ثالثا... احتمال رابعا

نبدأ بأولا
انا ماسكه نفسى من الضحك من ساعة ماحذفت البوست اللى فات
Be careful what you wish for
هو مقعدش ساعتين على بعض
وعلى الرغم من انى مسحته الا انه موجود فى الريدر عندكم وكل ما ادخل عليه مالقيهوش زى ما حصلكم بالظبط
ههههههههههههههههههه
اصلى كنت كتبته فى عجاله وكان ملخبط علشان مكنتش بكتبه من البيت
لان النت كان فاصل
طيب كنتى بتكتبيه منين يا منى؟؟؟
اقولكم يا حلوين
كنت بكتبه من الشغل:)
ايون زى ما سمعتوا كده
الحمد لله رب العالمين
اشتغلت بفضل الله
شكرا يا أميرة كتير خالص
ربنا يحقق لك اللى تتمنيه كله ويبارك فيكى
البنت دى جدعه اوى ربنا يكرمها
عندها طموح بطريقة يارب عمره ما يروح من عندها
نيجى بقى انا سميت البوست كده ليه
Be careful what you wish for
لما كنت عملت بوست وحشتنى المعارك
مكنتش اعرف انها هتحقق وهتبقى اسم على مسمى
لان دلوقتى دى بقت معارك بجد
هههههههههههههههههه
ـــــــــــــــ
نشوف ثانيا بقى
يوم الجمعة اللى فاتت كان 16/1
تاريخ اول بوست فى المدونة بحالها
كنت متضايقة جدا يومها وبتنرفز من اى حد
مكنتش اعرف ليه
ربما واحتمال كبيرلان النت كان فاصل ومكنتش عارفه اكتب البوست ده
وانى مشفتش المدونة - اصلى بقيت لما افتح المدونة وبمجرد ألمحها كده يومى يبقى سعيد
مش عارفه بفرح ان كتبت كلام طالع من جوايا ولقيت ناس معايا بتشاركنى فيه
الحمد لله
انا اخدت صورة لها علشان ابقى فاكرة كان شكلها ايه وقت كتابة البوست ده والقالب كان ايه وكده




نتكلم بقى عن السنة دى
كان اول بوست هو الاغنية اللى سميت بيها البلوج
بس فعلا لما سميت المدونة كده مكنتش اعرف ان هحسها اوى بالطريقة دى
المهم كترت المواضيع الحمد لله ووصلوا 70 موضوع
يارب اللى كتبته يكون ليا مش عليا
اكتر حاجه اتضايقت منها اوى انى كتبتها يوم ما اشتكيت من محمد
بس محمد ما اتغيرش
انا اللى ظروفى كانت اتغيرت
لما اتخطبنا كنت بشتغل وكمان كنت فى الدبلومة
علشان كده بقولكم الفراغ وحش اوى
ابقى قاعدة بس للتفكير والوساوس
ومش اى وساوس
الحمد لله رب العالمين على كل حال
ربنا يكتبلك كل الخير يا محمد يارب انت وشباب المسلمين كلهم
انا اسفه لو يوم زعلتك
ومش مسامحه نفسى على يوم ما اشتكيت ليك
ربنا ييسر الامور يارب
نرجع للمدونة تانى
مامتى بتتضايق اوى من كلمة مدونة
ههههههههههههههه
فبقيت اقولها ملونة
مدونتى بجد مكسب كبير اوى
فيها بكتب كل اللى جوايا
يعنى بتشاركنى كل لحظة وكل فرحة وكل دمعة برضه
عارفين انا بكتب عن حياتى ليه هنا؟؟؟
اصل احتمال احتمال يعنى ابقى حاجه كبيرة كده وابقى مشهورة
ويرجعوا يكتبوا قصة حياتى من هنا
ههههههههههههههههههههههههههههههههههههه
وده مصدر موثوق منه ده انا اللى كاتباه
امل بقى تقولوا ايه
ومكسب كمان بمعرفة ناس جميلة
مفيش بيربط بينهم غير الحب
مفيش مصالح
ينصحوك من قلبهم
وكفايه انهم بيفهموك
الحمد لله
شيرى كانت اول حد يعلق عندى فى المدونة
كنت فرحانه اووووووووووووى هههههههههههههه
اوشن ايز كمان بس مش عارفه راحت فين يارب تكون بخير
باربى جيرل برضه
وكمان اينو حبيبتى
اينو دى اللى حكايه
معرفش ايه بجد اللى شدنى ليها وبجد حبيتها اوى.. كانت اول حد يبعتلى تاج
ههههههههههه كنت فرحانه جداااااااااا وعرفت موضوع الدبلة معاناها ايه وقلت لاصحابى عليه يااااااااه ايام اه والله
الحمد لله
المفقوعة مرارتها و بطوط حبوب
راح علق على اول موضوعين كمان ربنا ينجحه يارب ويوفقه فى حياته .. بجد هو انسان ماشاء الله عليه ربنا يبارك فيه
انور .. حمامه.. رئيس جمهورية نفسى
صوت من مصر.. كان نورنى فى الاول خالص خالص وغاب فترة بس رجع تانى
برضه ربنا ينجحه يارب ويجمعه هو وسارة على خير يارب
حاسوباتيه ... عسولة مبتحبش المذاكرة وبتحب الفرااااااااغ
بقولك خلى بالك من الفراغ
هو اه يمكن بتحسى براحه فى الاول بس بجد اشغلى نفسك بأى حاجه اقرى املى وقتك وخلاص
بوسى بسبوسة الغالية دى صاحبتى بقى طبعا اكيد كلكم عارفينها
اكتشفت انى بتكلم عنك كتير يا بسبوسة ربنا يريح قلبك وعقلك يارب ويحميكى
روزا ردت عندى مره واحده بس وعملت مدونة فيه موضوع واحد ومن بعدها معرفتش عنها حاجه ولا هى مين
يارب تكون بخير
ماهى.. دى بقى اخت واحده صاحبتى من صناع ما اكتشفتش كده الا لما سألت ثورة عنها وهى اللى قالتلى
برضه من زمان ما شفتهاش
نوووووووسه... جينا بقى لنوسه
اول ما قرأت مدونتها بجد حسيت ان انا اللى كاتبه الكلام ده او كأنها بتتكلم عنى
عرفتها تقريبنا فى شهر اتنين او تلاته وكنت بعمل شيت الترجمة وقعدت فى مدونتها كتير اوى ونسيت الشيت خاااااااااااااالص
ههههههههههههههههه برضه ربنا ينجحها ويوفقها يارب فى امتحاناتها وحياتها يارب
محمد هشام ... رئيسة حزب الاحلام... رانيا... وائل...
الحب القديم- اللى دوختنى على ماعرفت مين هى وطلعت اقرب واحده ليا بعد ما شكيت فى الناس هههههههه
يوكى... استاذ راجى... سفينة اللى ضحك علينا وغاب وقال عدولى يارب يكون بخير ويكون انقطاعه ده مش حاجه وحشه ليه
دعاء مواجهات... موناليزا...عاقلة اوى وبجد بحب دماغها ومواضيعها دايما بتفوقنى ربنا يبارك فيكى يارب
احمد سمير... شيماء سمير... جودمان....
منى... منمونه منامينو بلدياتى
اللى عرفتنى واتقابلنا واول حد كنت اقابله من عالمى الافتراضى وتقريبا هتبقى اخر حد يا منى
بحبك يا منمون ووحشتينى والله جدا خالص
وومن... اول بوست قرأته لها بتاع عم حميد كانت قصه قصيرة بس بجد تحفه
اسلوبها خرافه وكنت مستمتعه جدا.. جميلة وفرحنالك كتير ربنا يبارك فيكى يارب
ابو يحيى وادم...
بنت مصرية.. بنوته جميلة بجد هى استشاريه نفسية واول رد لها عندى كان على تاج وحللت شخصيتى
كنت فرحاااااااااااانه
عارفه... مش عارف ليه
اقول ايه
اخ جميل ... حبيت اسلوبه فى القصص جدااااااا اول قصة كانت شهداء بلاط الملكة عجبتنى بصراحه ودايما اعيش جو المواضيع اللى بيكتبها
الجده فصيحة...كوارث... حراء...
لست ادرى.. بنوته جميله مقصرة فى حقها من زمان بس حبيبتها اوى
ليكوريكا... واجمل الرباعيات والشعر التمام هانت على الامتحانات ربنا ينجحك
سفاح كرموز... دماغ واجمل طرطشة افكار ومقالش على المفاجأه
فانكى دكتور... صبح صبح على المذاكرة.. صوره دايما فيها دم وصعبه جدااا
معلش معلش انا عزراك من اللى بتشوفه فى دراستك
برضه هانت ربنا ينجحك ياااارب
نعكشه نعكوشه... البنوتة دى والله مستحملانى والله زرتك كذا مره وقريت معظم مدونتك بس سبحان الله النت معاندى جدااااا
كنتى قفلتى التعليقات مش عارفه فتحتيها تانى ولا لأ عموما وحشانى جدا والله
هوندا... حبيبتى الغالية ريحة الحبايب ولمة الخير
قلب ابيض...موجه...
عروسة ننوسه اللى طلعت شفقه هانم ااااااااه يانى ماشى ماشى ماشى
عاشقة الحب .... عيلة مفترية سابقا...
احمد محيي... غاب كتير يارب يكون بخير
ممكن... كفراوى...
ايمن بدر... ومدونى الدقهلية
سنوهى.... زينب.... ابو حبيبه... ياقوت....ادم المصرى...صباح الصباح
محاسن صابر.... حبيبتى اللى بتقول عليا بنوته رقيقه بجد بجد انتى عسوله اوى ربنا يخليكى ليا يا سنسن
والله يا جماعه اخت بمعنى الكلمة بتنصحنى فى الوقت المناسب ونصيحتها دايما صح .. ربنا يوفقك يارب يا محاسن ويحميكى يارب ويخللك عبد الرحمن يارب ويبارك لك فيه
دكتور محمد الجوهرى... دايما مش عارفه ليه فى امتحانات.. ربنا ييسر امورك كلها يارب
عتبه واحد... قهوة بالفانيليا شيماء على.... حبيت قصصها جداااا هى كمان اسلوبها برضه جميل اوى ماشاء الله
بلو وايف... شعره ماشاء الله عليه وكتباته جميله وتدخل القلب بجد
ليدى... اجمل طفلة مش عايزه تكبر وانا والله كمان عايزه ابقى طفلة يا ليدى.. حبيبتى معايا فى الكفاح وطلعت نفس الجامعه والكليه والقسم
صدف صدف صدف لا وكمان القالب بتاع مدونتها الاول هو نفس قالب مدونتى اللى كنت غيرته واخترت اسود وبعدين قلت من فات قديمه تاه... ربنا ينحجك يا ليدى يارب
فوكس... خلى بالك من اينو ربنا يسعدكم يارب
حسام ... شملولى ابن سحلولى....
نهار او M.K معرفة شهر الخير وحشتينى اوى
فاكره افكارنا المتشابهه دايما
معلش معلش والله على تقصيرى بس بجد وحشانى اوى
باجوجو... يوما... يونيك جيرل....
كيارا كوكتى حبيبتى... دى يتقال فيها كلام وكلام... اهم حاجه ربنا يحميكى يارب
ومش هنساكى فى المصاصه:)
نهر الحب ... مصطفى... بنت سيناء... عاقلة على ارض الجنون....
دينا ... بنت جدعه اوى وحبوبه ربنا يوفقك يا دينا وينجحك يارب
المصرى...
self meaning... برضه حسيت انها قريبه منى اوى ومسكت مدونتها من اولها لاخرها قرايه وطلعت زمل:)وحشتينى يا نهى
ميمى... صديقه .. بحبها.. وحشتنى اووووووووى معلش يا ميمى سامحينى على التأخير
انى احبكم فى الله....خديجة محسن "لؤلؤة الاسلام....
انا ودماغى.... هانى علوان.... برقش.... مجنوووون.... مش لاقيه اسم....
انجى ... انوج واسلوبها الجميل دكتورة المستقبل ...ورفعوتى- وش بيطلع لسانه- هههههههههههه
ايمى بيبى... اللى كانت عايزه تطلع مدرسه علشان تضرب العيال
هههههههههههههههه وحشتينى اوى يا ايمى هانت كلها كام يوم وترجعلنا تانى بعد الامتحانات ويارب نتيجه تشرف
عايش ولكن.....
رومانسى... طبعا باين من الاسم ماشاء الله عليه وعلى كتاباته
نو بروميسيز... عبد التواب محمد....
اه وصلنا بقى لابو على... بفرح جدا بوجود تعليقه فى مدونتى دايما ماشاء الله كلامه جميل ربنا يبارك فيه يارب
امير البلانكو....انجى ... احمد وشيرين....نو فور دانمارك ... معرفتش والله انك علقت غير من حبه صغيرين اسفه والله
بيرم المصرى...
طالب ثانوى... اتأخرت فى اجابة التاج معلش بس ان شاء الله هجاوبه حاضر والله وربنا ينجحك يارب وتخلص من الثانوية العامة بقى
انا انسان.... د/ رامى شهاب الدين.... مس جى اتش... الروميصاء....
بيربل وايفز... سمكة واحده... فارس القمر... محمد غاليا... حياتنا الزوجية... ابو فاطمة.... شهد الكلمات.... انا حرة....
مستر ايه اس... كلمة حق....مصطفى ريان.... انجيل.... اقصوصه.... وحى القلم.... ضد التيار.... الشاعر.... المستنصر بالله.... مفكر... جيجى.... من غير عنوان.... ميرو مورى... اخر العنقود... غربتى... البت المشمشيه حلوه بس شقيه..... ساعد نسرين الايمن.... ريمان.... مستر بريزدنت.... هولى داى... مرمر... برنسيس... حنان الشافعى... عابرة سبيل... منوشا
ـــــــــــــــــ
يارب مكونش نسيت حد
سامحونى لو قصرت
بس بجد معرفتكم كنوز

لما بغيب عنكم
بحس انى مقصرة مع الناس اللى حواليا وواخده من حقهم كتير
والحوار بيبقى صعب اوى لدرجة انى خفت جدا من المدونة وكتر تعلقى بيها
بحاول انى اوفق بين العالمين دول
للاسف مش عارفه
عموما ربنا يسهل
ـــــــــــــــــــــ
فاكرين ثالثا؟؟؟
انا نسيت اساسا ان كان فيه اولا وثانيا
فيه مفاجأه جميله اوى شغاله فيها دلوقتى
عايزه دعواتكم بالله عليكم
علشان لو طلعت صح هتكون جميله اوى وبجد هتفرح ناس كتير
بوست طويل وخد منى اربع ساعات كتابه
محاذاة إلى الوسطلو فيه اخطاء عدوها لانى ما راجعتوش
الساعه دلوقتى6الفجر
سلام

Sunday, January 11, 2009

اهو كلام

بسم الله
ازيكم عاملين ايه
يارب تكونوا بخير
انا قلت اتكلم شويه معاكم او مع نفسى بدل ما افرقع
حاسه انى مش لاقيانى زى زمان
بس تعرفوا انا يمكن احسن من زمان
ـــــــ
فى حالة طوارئ علشان الامتحانات فى كذا مدونة
وانا زعلانه علشان مبذاكرش
ااااااااااخ يانى
وحشتنى اوى المذاكرة
والله حاسه انى مخى هيضرب
افتكرت السنة اللى فاتت
لما كنت بذاكر مع بسبوسه
وكنا بنعيط انا مره وهى مره ونقعد نصبر بعض
هههههههههههههه والله كانت ايام عسل
ومذاكرة القطر ايام امتحانات العملى
ولا اول يوم امتحانات والعربيه باظت مننا فى الطريق والافيهات اللى كنا بنقولها
وحشتنى المجموعه دى اوى
حنان واسماء ومنى وبوسى
واصحابى اللى عرفتهم من كفر الشيخ
ايمان وسحر وسمر وسوزان
ولا يوم بلطيم
كان اخر يوم امتحان لينا ورحنا بلطيم انا ومنى وبوسى
على فكره لسه شايفه صوركم دلوقتى وحشتونى اوى
مش حرام ان كل واحده راحت فى بلد
يلا ربنا يوفقكم يارب ويحميكم ويحرصكم يارب انتو و شباب المسلمين يارب
ـــــــــــــ
احساس وحش اوى لما كل اللى حواليك يبقى عارف قيمتك الا انت
ــــــــــــ
الكلمة
ممكن تحيك وممكن تموتك
ـــــــــــ
من يومين شفت بالصدفة كليب الحلم الجميل لهانى شاكر
اتأثرت اوى بيه
وهنا بقى فيه سؤال
ليه احنا بندور على النكد
وليه اكتر الاغانى كده
تعيشك احساس الالم مليون مره
ـــــــــــــ
قريت جزء من كتاب "جدد حياتك "للغزالى
واتكلم عن افات الفراغ
اذا لم تشغل نفسك بالحق شغلتك بالباطل... الشافعى
خلوا بالكم بجد من الفراغ
وحشششششششششش جدااااااا وبكرهه اوووووووووووى
الحمد لله رب العالمين
لو فكرنا كده انك لو شغلت نفسك بحاجه
عمر القلق والوساوس ما هتقربلك
لانه استحاله على الذهن البشرى انه يفكر فى حاجتين فى نفس الوقت
وده قريب من قول الله عز وجل فى سورة الاحزاب
"ماجعل الله لرجل من قلبين فى جوفه"
ـــــــــــــ
فرحانه انى لقيت كتاب سيدات بيت النبوة على النت علشان دورت عليه قبل كده وملقتهوش
كنت اشتريته من 3 سنين اعتقد او اكتر
وصاحبتى اخدته منى وسافرت ومن يومها ولا اعرف عنه حاجه
الكتاب لعائشة عبد الرحمن .. بنت الشاطئ
بجد جبار ما شاء الله
ان شاء الله اقراه وهجيبه لكم هنا
ــــــــــ
احساسى بالعجز وان يكون رد فعلى انى اعيط وبس وانى مش قادرة انقذها ده تاعبنى اوى
والله مش عايزاها تجرب اللى انا جربته بجد احساس مؤلم
هو احنا ليه مش بنسمع كلام اللى حوالينا لما ينصحونا ويقولولنا على خبرتهم ويوفروا علينا التجربه والفشل
احنا كده بنضيع عمرنا فى الم وخلاص
ساعات بحس بالغباء
ـــــــــــ
"ربنا يحميكى"
قالهالى عم ابراهيم
بجد دخلت جوا اوى
من يوم ما سمعتها وبقيت احب اقولها وادعيها لكل الناس
بجد احساسها حلو اوى
يارب اسمعها دايما
وربنا يحميكم يا شباب المسلمين وينصركم يارب
ـــــــــــــ

كنت مخنوقه مره ورحت لصاحبتى واتكلمت معاها وقعدت احكى لها وكده
قالتلى
انتى معدتيش بتابعى برامج دينيه
وفعلا انا معدتش بتابع
ساعاتها حسيت انها فعلا صحبة صالحة
وحشتينى يا بلبله اوى
اهو انا زعلانه بقى علشان معدناش بنشوف بعض... بقالنا 3 سنين من ايام الكلية
على الرغم ان احنا كنا واخدينها جد اوى بس كانت ايام لذيذه
لما بنقعد نفتكرها زعلت منك لما قلتى ياريتنا ما عشناها علشان منفتكرهاش
ربنا يصلح لك الحال يا رب وتتحققى كل اللى تتمنيه يارب ويروق بالك
ــــــــــــ
انا بحبك يا هدهود اوى
ربنا يخليكى ليا يارب
بحب لما بقول الكلمة انا وانتى فى نفس الوقت
كتير بيحسدونى عليكى
عارفه حتى خناقاتنا هتوحشنى وهفتقدها
اااااااااااه فى حاجه
صاحبتك امو الفظيعة
عنيها صعبة اوى يا هدهود
فاكره لما شافتنى بذاكر مره ومن بعدها مقدرتش افتح كتاب وكنت فى الليسانس وكانت حالتى هباب والبيت كان جحيم بجد وقتها
وتعبت الكل معايا
انا مش عارفه هى كده ازاى مع انها بتقول ما شاء الله
عموما الحمد لله الذى عافانا
ـــــــــــ
شكرا لصبركم فى قراية الكلام ده
ياريت اطلع بدروس مستفاده
ههههههههههههه
والى لقاء اخر مع شوية كلام تانى
بصراحه مبسوطه بالبوست ده اصلى من زمان مفضفضتش

Thursday, January 8, 2009

اذن يا بلال

الله اكبر... الله اكبر
لا اله الا الله
اذن يا بلال... اذن يا بلال
اذن يا بلال فوق الاقصى وانده للخلق اللى هتنسى
اذن يا بلال... كبر لصلاة
تجمعهم تانى لبيت الله وتطمن قلب رسول الله
ان الاسلام موجود لسه
اذن يا بلال
انده على امة بقت اغراب وعلى ابن العاص افتح ابواب
القدس لعمر بن الخطاب هيطهر مسرى رسول الله
اذن يا بلال ... كبر لصلاة
تجمعهم تانى لبيت الله وتطمن قلب رسول الله
ان الاسلام موجود لسه
ادن يا بلال فوق الاقصى
انده على فارس يحيي الدين ويعلى الراية فى فلسطين
وعلى المغضوب هنرد امين ينصرنا المولى بجند الله
اذن يا بلال... كبر لصلاة
تجمعهم تانى لبيت الله وتطمن قلب رسول الله
ان الاسلام موجود لسه
اذن يا بلال فوق الاقصى
"احد" يا بلال هنقولها وراك وميعادنا يكون فى القدس هناك
ويا اقصى الكل هيبقى فداك والروح هتهون فى سبيل الله
اذن يا بلال... كبر لصلاة
تجمعهم تانى لبيت الله وتطمن قلب رسول الله
ان الاسلام موجود لسه
ادن يا بلال فوق الاقصى
الله اكبر... الله اكبر
لا اله الا الله
ــــــــــ ــــــــــ ـــــــ
للتحميل اضغط هنا
ـــــــــ ـــــــــ ــــــــ
الاغنية دى بتزن فى دماغى بقالها كتير اوى