My photo
I'm a girl who lives sometimes in a good mood and sometimes oh in a very very bad one

Friday, February 29, 2008

تتجوزينى على الطريق الصح

في كلام لما بيتقال بيغير كل حياتنا معاه .
عنه بيستاهله ندور طول العمر و بنستناه .

أنا من اللحظه دي بقولك إني بحبك أكتر مني . 
إنتي إللي علشانك بكتب شعر و إنت إللي علشانها بغني .
تتجوزيني .
تتجوزيني مش عايز غيرك في الحياه أوعي تسبيني .
من غير ماأتكلم إنت بتسمعيني .. عشانك أطول السما لو حبتيني .
أنا حاسس إن الكون وياكي بشوفه بشكل جديد .
الدنيا بتضحك و انت معايا و تكشر و إنت بعيد .
أنا شايف فيكى ولادنا و مستقبلنا و دنيا آمان .
مهما هنكبر كده و نعجز هفضل أحبك زي زمان .
تتجوزيني مش عايز غيرك في الحياه أوعي تسبيني .
من غير ماأتكلم إنت بتفهميني .. عشانك أطول السما لو حبتيني .
أنا من اللحظه دي بقولك إني بحبك أكتر مني . 
إنتي إللي علشانك بكتب شعر و إنت إللي علشانها بغني .
تتجوزيني .
تتجوزيني مش عايز غيرك في الحياه أوعي تسبيني .
من غير ماأتكلم إنت بتسمعيني .. عشانك أطول السما لو بتحبيني .
تتجوزيني مش عايز غيرك في الحياه أوعي تسبيني .
من غير ماأتكلم إنت بتفهميني .. عشانك أطول السما لو بتحبيني .

دى كلمات اغنيه جمييييييييييييييله جدا جدا جدا جدا
والملحن بتاعها هو نفسه الداعيه الشاب معز مسعود

ايه اللى فكرنى بمعز تانى ، تفتكروا ايه؟
الاول قولولى: انتو عارفين مين معز ؟
هتقولولى: معز مين؟
اقولكم: معز مسعود داعيه شاب ربنا يبارك فيه
انتم: عرفتيه امتى يا منى وفين وازاى وليه؟؟؟ جاوبى
انا: حاضر بس بالراحه عليا شويه، انا عرفته تقريبا من 2003 وفضلت معاه كده، بدأ ببرنامج (امثله فى القران) وبعدها ( الطريق الى الجنه) ونزل جزء تانى من (الطريق الى الجنه) بس هو بيتكلم فيه لواحده لان قبل كده البرامج بتاعته كانت عباره عن Talk Show ويجى معاه مجموعة شباب
بعدها عمل برنامج لايف على الراديو كايرو اف ام اسمه
So Close No Matter How Far
وكلها كانت باللغة الانجليزيه عجبنى اوى اسلوبه وطريقته
واخر برنامج كان (الطريق الصح) واتذاع فى رمضان اللى فات
ده بقى بالعربى 
بصراحه كان هايل اوووووووووى
ربنا يعزه ويصلح حاله يارب
عموما انا مهما حكيت مش هقدر اوفيه حقه ولا اوصف هو اد ايه جميل جدا
علشان كده انا عايزاكم تعرفوه انتو كمان
الاول ده لينك الاغنيه
http://www.4shared.com/file/38340048/f53952a9/_online.html
وده بيان حوالين الاغنيه
http://www.moezmasoud.com/forum/viewtopic.php?f=14&t=1625&sid=b3dd7c05a4bfbe8b5e6364929fa4dc30
ولو حاولتو تتصفحوا المنتدى هتعرفو حاجاااااااااااااااااات كتير اوى عنه
يعنى مثلا ده حوار كان على بص وطل معاه
http://www.moezmasoud.com/forum/viewtopic.php?f=14&t=1653&sid=b3dd7c05a4bfbe8b5e6364929fa4dc30

اسيبكم بقى مع معز مسعود

اه اه نسيت اقولكم انا افتكرت معز من تانى ليه
صاحبتى جت لى النهارده بقالى كتير اوى مش شفتها ولا لكينا من زمان-على فكره هى بتموت فى معز وبتتمنى تتجوزه، انا ادعيلها يارب يرزقك بزوج زيه ، تقولى حرام عليكى اسحبى الدعوة دى- المهم ان احنا عرفنا اخباره النهارده ومن هنا عرفت الاغنيه الجميله دى

Saturday, February 16, 2008

بداية

بسم الله الرحمن الرحيم


فات شهر من ساعة انشائى للمدونه
مش معقول ما جاش فى دماغى افكار، بالعكس انا دارت جوايا حاجات كتير اوى
حاجات ملخبطه
وحاجات جميله

اول موضوع عملته هو الاغنيه اللى سميت بيها البلوج
انا عارفه كلنا بنحس بكده ساعات ساعات

مش عارفه انا عملت البلوج ليه؟
كل الناس اللى قريت لها بلوجاتها كانت بتدور حوالين يومياتها والحاجات اللى بيحسوها ، اكترها نقد وفعلا "وكان الانسان اكثر شيئا جدلا"

عايزاها بدايه جامده
وانطلاقه لايه مش عارفه
ولسه مش عارفه هكتب ايه

بس بجد كل اللى بحسه هو ساعات ساعات
توكلنا على الله
وان شاء الله اقدر افيد ويارب قدرنى
واكون خفيفه على اللى هيزورا المدونه دى _ده ان حد عبرنى اصلا_ بس ايه انا عندى امل فى ربنا ان شاء الله صح ولا ايييييييييييه؟

نسيت اعرفكم بنفسى
اسمى منى
ليسانس اداب انجليزى 2006
جامعة المنصوره
اشتغلت مدرسه مع ايقاف التنفيذ نظرا لانى بكمل دبلومه عامه السنه دى
يارب بجد تعدى على خير واطلع بتقدير يشرف كده
ومش بعيد اكتر المواضيع هتكون من خلال دراستى ، المواد لذيذه الى حد ما ، يعنى حاسه انى حباها مع انها كتيييييييييييييييير جدا مش زى ما كنت متعوده فى كليه اداب

اعتقد كده كفايه واكيد هتعرفونى من خلال المواضيع ان شاء الله
لنا عوده بإذن الله
السلام عليكم