ساعات ساعات

:) 11/2 يوم تاريخى وكمان اول شهر :) يوم مختلف من كل النواحى وكمان جمعه مش عارفه بقول ايه بس الحمد لله مبسوطه اه كمان عرفت العب مصارعه حتى صباح اليوم التالى مختلف كنت بقوم والاقى هدوووووووووووووء اما دلوقتى كلام ودوشه بس على قلبى زى العسل سبحان الله المكان بيغير طعم كل حاجه السلطة هى هى بس طعمها مختلف هنا عن هناك وكمان كوباية الليمون اللمة مختلفة الحمد لله رب العالمين الحمد لله كلامى اللى فوق ممكن يتفهم بمعنى تانى وده بيفكرنى بالكتاب اللى كنا بندرسلهم ويكتبوا حاجه واحنا ممكن نطلع وننقد حاجه مكانتش فى خيالهم ولا كان قصدهم عليها

وحشتينى يا مدونتى وحشتنى فضفضتى معاكى قوى الفضفضه وحياتى قبل كده مش لاقياها ما علينا اى نعم انا تعبت بجد من المقارنة الحمد لله رب العالمين بقيت بيتوتيه جدا بحاول اتأقلم يارب اهدى ليا الحال وبجد نفسى دماغى تبطل تفكير شويه نفسى ترتاح

اللهم الهمنى رشدى وقنى شر نفسى اول ما هبدأ كلامى لازم اكلمك انت الحمد لله رب العالمين يارب بارك لى يارب انا عارفه انك دايما معايا ومش هتسبنى وانا متأكده ومتطمنه على نفسى الحمد لله بجد حاسه بكرمك ورحمتك بيا يارب فرح ماما وبابا ويتطمنواعليا بجد نفسى افرحهم قوى هيوحشونى مهما اتخانقنا ولا زعلنا هما اللى بيصلحونى وبيتمنوا انى اطلب حاجه وينفذوها حتى من قبل ما اطلبها ياترى الحياه الجديدة دى شكلها هيكون ازاى انا عارفه انه كله بيعدى والناس كلها عايشه عادى بس المشكلة انك مكنتيش كده يا منى انتى مكنتيش عادى بقيتى تتصرفى عادى كنت بستغرب لما الاقى حد ساب شغله واتفرغ للموضوع ده وبس انا عملت كده بس على فكره هى مسؤليه ومسؤلية كبيرة كمان ان شاء الله ربنا هيعينى الحمد لله الحمد لله الحمد لله حاجات اتغيرت فيكى يا منى فرحت بحاجات جديدة جميلة وبنانيتى بقيت اخد بالى جدا من كلام الناس ونواياهم محدش عاد سهل ابدا قلبى بقى مليان مشاعر مختلفة نبدأ بالحب جميل فيه غيرة وده مش حلو وكمان كان فيه كره اتضايقت انى ممكن اكره انسان بالدرجه دى او ان شعورالكره ده يكون جوايا اللهم نقى قلبى يارب العالمين فيه فرحه كمان فى قلبى...

فات شهر 7 وكمان شهر 8 و9 اهو بيودع لا رحتى المكتبة ولا حاجه يا منى ما علينا والله وحشونى الناس هناك فى المكتبة طيب يعنى اعمل ايه تصدقوا ممكن اروح بس ده النهاردة الخميس وبكرة الجمعه وكمان السبت اجازة حتى لما قررتى منفعش اعمل فيكى ايه بس يا منى اختى بتقولى انتى مش عاجبانى يا منى ولا انا والله واكيد انتى عرفتى يا مدونتى لانى رجعتلك تانى المهمممممم انا هكمل قراية كتاب اماكن فى القلب لاستاذى عبد الوهاب مطاوع من على الجهاز وخلاص تصبيرة بعد ما نسيتى القراية ده انا حتى بقيت بطيئة فى الكتابة اخ ماذا افعل؟؟؟ ولا حاجه روحى اقرى وخلاص يا منى

هتكلم عن كتاب السر انا قرأتته من شهر يناير وكنت عايزة اكتب عنه مش عارفه اتأخرت ليه ما علينا الكتاب جميل على فكره نفذت جزء فيه واتحقق الحمد لله جزء تانى طبقته غلط خالص ههههههههههههه كنت بقول لنفسى انا عصفورة لغاية ما بقيت عصفورة بجد اكيد العكس اللى حصل لا بس بجد كان محتاج شوية قوة ارادة ودى حاجة اكتشفتها فيا مؤخرا ما علينا ده انتى بقيتى لكاكه اوى يا منى نتكلم عن بعض الجمل اللى فى الكتاب اللى لفتت نظرى * اول حاجه خالص هى the law of attraction in action بداية الكتاب بيتكلم عن اللى انت بتتخيله هو اللى هيكون وده بالظبط زى " تفائلوا بالخير تجدوه" وانا عند حسن ظن عبدى بى" كاتب قال: ان افكارنا زى ارسال اشارات التليفيزيون ممكن اغير الارسال علشان اغير الصورة... ممكن ليه لاء I'm the master of my thoughts I can change it from bad to good ولو انا عايزة اغير المود بتاعى من وحش لحلو افكر فى حاجه جميلة انا مثلا احب اغنية... حتة موسيقى .. طفل... اى حاجه حلوة ممكن فيلم رومانسى.. العب مع القطة... اكل شيكولاته.. اتفرج على الطبيعة والخضرة... اشوف حد سعيد... مدونتى كمان اسمع كلام ربنا من ...

لو هنتكلم عن التمثيل فيه حاجه انا كنت بعملها يمكن من غير احساس قبل كده ودلوقتى بعمل نفس الحاجه بس باحساس وده مدينى احساس انى اول مره اعملها لانى بعملها فى وقتها الصح اللى ربنا كاتبه فعلا الحمد لله رب العالمين انا حسيت بانتصار بجد حاسه انى حققت حاجه محصلتش قبل كده فرحانه بكده على فكرة يبقى ده مش تمثيل ده حقيقة انتى فيكى حاجات كتير حلوة يا منى دورى بس واكتشفى نفسك يارب احفظنى استودعك نفسى خليك معايا يارب "معية الله" الله يا رب يا رب يا رب

مدونتى انتى عارفانى صح؟؟ وعارفه انى هاجى احكيلك على موقف النهارده بصى هو هيضايقهم وهيتعب اعصابهم لفترة قليلة وده غصب عنى لانى بجد هرتاح من تعب القلب ده وانى احاول ارضى الاتنين على حساب نفسى بس هما صعبانين عليا اوى هاين عليا ارجع فى الكلام اللى انا قلته بس بقول خلاص اللى حصل حصل ياترى ممكن يحصل فى يوم ويذلنى علشان الموقف ده بس ده حقى وهو عارف كده وان انا عايزة كده انا ضربت اول بمبة وفرقعت صح ونشنت تمام بس تعرفى يا مدونتى وانا بقول البمبة دى كان هاين عليا اضحك واكتم فى الضحكة وهى بتفلت منى ااااااااااااااه كان نفسى حل الموضوع ده يكون على ايده هو مش انا لان انتى عارفه انى مبحبش اشيل مسؤلية بحب دايما يكون حد شايلنى هقنع نفسى وان شاء الله ده اللى هيحصل بإذن الله الموضوع هيعدى على خير وعمره فى يوم ما هيحصل اللى انا خايفه منه لانى خلاص حاسه بأمان وثقة بالله الحمد لله رب العالمين ----- اجمل ما فى الموضوع انى همثل وهلعب لعبة صغيرة وانا مجنونة وبحب الحاجات المجنونة ومفيش اجن من كده كان طول عمرى حاسه انى حياتى دى مسلسل وانى انا البطلة وفيه حد بيتفرج عليا بس مستنياه يجى يقولى ويوجهنى وجه فعلا عموما...