ساعات ساعات

احلام مركونه محتاجه تتحقق هتتحققى صح الراديو ادمن لأول مره كونسولتو دكاتره الرخصه ف بدايه السنه نهايتها فيها ايه!!!! ٢٠٠٦ زى ٢٠١٦ فرق واحد؟ الإنسان يعيش مره واحده كان زم...

كانت كل سنة جديدة بتعدى عليا أقف كده مع نفسى واشوف انا حققت ايه وعلى الساعة 12اكون متوضيه وبصلى علشان ابدأها بطاعة لربنا ومعاه وماما كانت بتبقى مبسوطه منى اوى 2015 هتضحكى صح؟ انا كنت كلمت 2010 هنا وضحكت ليا وقتها بجد يا رب اصلح لى شأنى كله ولا تكلنى الى نفسى طرفة عين حسبى الله لا اله الا هو عليه توكلت وهو ارحم الراحمين حسبى الله وكفى حسبى الله كل سنة وانتم طيبين ويارب تكون سنة سعيدة علينا كلنا

من زمان معملتش الحاجه بتركيز كده ... عايزه ادور علي نص الحديث اللهم بارك لأمتي في بكورها انتي عارفه يا مني ان كل حاجه بتتعمل بدري مبتحسيش بيها اخلص كل شغل البيت بدري قبل حتي م...

مش المفروض انتى مدونتى ومساحتى الخاصه اللى بكتب فيها طيب ليه بقى بقالى فترة كبيرة مكتبتش فيكى مع ان فى احداث كتير مرت بيا يمكن اهم حدث فى حياتى بقيت ماما يعنى الملايكه حواليا لما بتكونى معايا بيلاعبوكى ويضحكوكى عرفت ان الجنة تمنها غالى اوى وعرفت ماما تعبت اد ايه ولسه ياما هشوف وحشتينى يا مدونتى ووحشتونى انتو كمان بحبك يا اجمل رشا ربنا يبارك لى فيكى يا حبيبة ماما

السلام عليكم ازيكم وازيك يا منى الاول كل سنة وانتم طيبين ورمضان كريم عليكم يارب هتكلم شويه لانى حاسه انى متكلمتش من زمان اللى هى الفضفضه اللى بينى وبين نفسى دى وانى اقف واشوف انا وصلت لفين لسه زى منا حساسة لدرجه تخنق ليه ما اخدش من وسع زى ما بيقولو لا بس انا عندى حق لما اسمع من شخص قريب منى اوى "انا بدأت اتخنق منك بجد" يا سلام برضه مش عايزة اكبر الموضوع علشان برضه فى اوقات كتير بتحسسنى بقيمتى وانا انا حاجه حلوة فى حياتك وبتحمد ربنا عليا بقيت اهتم كتير بالطبيخ واتفرج على فتافيت وكمان فيه مدونة ليها مدونتين واحده عادية والتانيه عن الطبيخ دخلت مباشرة للطبيخ جايز اكمنى بقيت فاضية ومفيش حاجه اعملها اد كده بقيت حاسه انى تافهه ومفيش حاجه اعملها بعد ما كان وقتى كله مشغول عموما كلها كام شهر وانشغل باللى مش هينيمنى ده على حد كلام الجميع يارب انت عارف ان بيبقى عندى ثقة ويقين بحاجات متأكده انك هتحققهالى زى اللى بتمناه لولادى ان شاء الله هيبقوا حاجه كبيرة اوى وهربيهم صح وهتقدرنى بجد على كده انت عارف نيتى وهيزودوا حاجه فى الدنيا دى احساس جميل اللى بيحصل جوايا بحبك:) من غير ما اشوفك وحشنى...

8 اسابيع ويوم النهارده كان يوم جميل الحمد لله وامبارح برضه كان مختلف مش عارفه انا اللى عامله فى نفسى كده ولا ايه بس هى مسألة تأقلم وتعود محتاجه منى انا وقت اللهم دبر لى امرى فانى لا احسن التدبير سامحنى يارب لو قصرت انا عارفه بجد انى مقصرة جامد بس انت عالم يااااااااااارب الحمد لله الحمد لله الحمد لله

:) 11/2 يوم تاريخى وكمان اول شهر :) يوم مختلف من كل النواحى وكمان جمعه مش عارفه بقول ايه بس الحمد لله مبسوطه اه كمان عرفت العب مصارعه حتى صباح اليوم التالى مختلف كنت بقوم والاقى هدوووووووووووووء اما دلوقتى كلام ودوشه بس على قلبى زى العسل سبحان الله المكان بيغير طعم كل حاجه السلطة هى هى بس طعمها مختلف هنا عن هناك وكمان كوباية الليمون اللمة مختلفة الحمد لله رب العالمين الحمد لله كلامى اللى فوق ممكن يتفهم بمعنى تانى وده بيفكرنى بالكتاب اللى كنا بندرسلهم ويكتبوا حاجه واحنا ممكن نطلع وننقد حاجه مكانتش فى خيالهم ولا كان قصدهم عليها

مدونتى انتى عارفانى صح؟؟ وعارفه انى هاجى احكيلك على موقف النهارده بصى هو هيضايقهم وهيتعب اعصابهم لفترة قليلة وده غصب عنى لانى بجد هرتاح من تعب القلب ده وانى احاول ارضى الاتنين على حساب نفسى بس هما صعبانين عليا اوى هاين عليا ارجع فى الكلام اللى انا قلته بس بقول خلاص اللى حصل حصل ياترى ممكن يحصل فى يوم ويذلنى علشان الموقف ده بس ده حقى وهو عارف كده وان انا عايزة كده انا ضربت اول بمبة وفرقعت صح ونشنت تمام بس تعرفى يا مدونتى وانا بقول البمبة دى كان هاين عليا اضحك واكتم فى الضحكة وهى بتفلت منى ااااااااااااااه كان نفسى حل الموضوع ده يكون على ايده هو مش انا لان انتى عارفه انى مبحبش اشيل مسؤلية بحب دايما يكون حد شايلنى هقنع نفسى وان شاء الله ده اللى هيحصل بإذن الله الموضوع هيعدى على خير وعمره فى يوم ما هيحصل اللى انا خايفه منه لانى خلاص حاسه بأمان وثقة بالله الحمد لله رب العالمين ----- اجمل ما فى الموضوع انى همثل وهلعب لعبة صغيرة وانا مجنونة وبحب الحاجات المجنونة ومفيش اجن من كده كان طول عمرى حاسه انى حياتى دى مسلسل وانى انا البطلة وفيه حد بيتفرج عليا بس مستنياه يجى يقولى ويوجهنى وجه فعلا عموما...

بسم الله ازيكم عاملين ايه يارب تكونوا بخير انا قلت اتكلم شويه معاكم او مع نفسى بدل ما افرقع حاسه انى مش لاقيانى زى زمان بس تعرفوا انا يمكن احسن من زمان ـــــــ فى حالة طوارئ علشان الامتحانات فى كذا مدونة وانا زعلانه علشان مبذاكرش ااااااااااخ يانى وحشتنى اوى المذاكرة والله حاسه انى مخى هيضرب افتكرت السنة اللى فاتت لما كنت بذاكر مع بسبوسه وكنا بنعيط انا مره وهى مره ونقعد نصبر بعض هههههههههههههه والله كانت ايام عسل ومذاكرة القطر ايام امتحانات العملى ولا اول يوم امتحانات والعربيه باظت مننا فى الطريق والافيهات اللى كنا بنقولها وحشتنى المجموعه دى اوى حنان واسماء ومنى وبوسى واصحابى اللى عرفتهم من كفر الشيخ ايمان وسحر وسمر وسوزان ولا يوم بلطيم كان اخر يوم امتحان لينا ورحنا بلطيم انا ومنى وبوسى على فكره لسه شايفه صوركم دلوقتى وحشتونى اوى مش حرام ان كل واحده راحت فى بلد يلا ربنا يوفقكم يارب ويحميكم ويحرصكم يارب انتو و شباب المسلمين يارب ـــــــــــــ احساس وحش اوى لما كل اللى حواليك يبقى عارف قيمتك الا انت ــــــــــــ الكلمة ممكن تحيك وممكن تموتك ـــــــــــ من يومين شفت بالصدفة كليب الحلم الجم...

كان يا ما كان.. فى مكان غير المكان... وزمان قبل الزمان بزمان كان فيه انسان... بيدور له فى الدنيا على مكان حب يجرب ويشوف الدنيا جه وقته خلاص انه يتولد بس ايه ده انا مش راضى اتولد ليه اربع ساعات او اكتر الولادة هى الدنيا وحشه اوى كده وحتى خلاص بعد ما اتولدت واللى كان كان نزلت زعلان ومش راضى اعيط ولا اتكلم ولا ابوح بصوت الداية قالت هى البنت مالها؟ حاولوا يفوقوها بصل ... كولونيا... اى حاجه البنت معترضه حست ان الدنيا وحشة اوى ودنيتها الصغيرة كانت اجمل بكتير لالالا دنيتى دى هتكون اجمل دى ماما وبابا حواليا مستنين افتح عيونى واتولد للدنيا علشان يفرحوا بيا ده انا اول فرحتهم مش حرام عليا اقتل فرحتهم دى بيا وجت فكرة للداية هات يا عم السيحارة ديا وخدت نفس كبير منها وفتحت بقى ونفخت فيه دخان السيجارة هب بطنى اتنفخت وادتها عطسة نونو على ادى كده ومن بعدها فقت وعشت حبيت الدنيا بس علشان ربنا كتبلى اب وام بجد نعمة كبيرة مستحملينى وانا صغيرة ووانا كبيرة يارب افضل اطيعكم ولا اعصى لكم امر وربنا يبارك لى فيكم ويخليكم ليا ودى كانت حدوتى تقريبا نفس الوقت ده قبل الفجر بشوية بس بتاريخ 22/ 12/ 1985 يعنى من 23 سنة...

هاخد اجازة ربنا العالم اد ايه بس ان شاء الله مش هتطول وان شاء الله لنا عودة مع كذا مناسبة حلوة اوووووووووى وحدوتة اوعدكم انكم لاول مرة فى حياتكم هتسمعوها كل سنة وانتم طيبين بحبكم اوى ربنا يخليكم ليا اللهم اعطنا من الخير ما تعلم انه الخير ورضنا به وما علمته غير ذلك فتكرم علينا بألا تجيبنا إليه وادخره لنا فإننا نسألك يا رب على قدر ما نعلم وما أقل ما نعلم واكثر ما نجهل اللهم ان قلوبنا وجوارحنا لا نملك شيئا منها فهى لك وحدك فحيث جعلتها لك وحدك فكن انت يا رب وليها ولا تحرك قلوبنا الا بحبك ولا تعمل جوارحنا الا فى طاعتك بحيث يكون كل امر منك ممتثلا ويكون كل نهى منك مجتنبا يا رب امين

وحشنى شكل الفصل اوى وحشتنى السبورة وحشونى الطلبة وحشتنى بحة صوتى فى الفصل اسكتى يا بنت ... اسكت يا ولد وحشونى البنانيت لما بيسلموا عليا ويبوسونى كل ما ادخل الفصل اكيد بنات ابتدائى مش اعدادى خالص بنات اعدادى وحشين شايفين نفسهم اوووى اما ابتدائى ملايكة وحشنى الجرى بتاعى من الدور التانى للسادس علشان الحصة وحشونى تلامذة 6 ابتدائى على الرغم من اللى عملوه فيا يلا بقى الله يسامحهم ولما اشتغلت بالمكافـأة فى بلد بعيد وحشتنى بهدلتى فى المواصلات علشان الحق ميعاد الحصة بتاعتى افتكرت اول حصة دخلت لسنة رابعه اعتقد وكانت تعارف وسألت كل واحد نفسه يطلع ايه وكده والطلبة قالولى زميلنا ده صوته حلو اوى وعايز يطلع مغنى قلت له قوم غنى.. وفعلا غنى وقلت له برافو حد تانى بيعرف يغنى؟ قالو لاء بس هنحفظ اغانى ونغنيها تانى يوم رايحة المدرسه عادى لقيت زمايلى مقابلينى وبيقولوا انتى بتخلى العيال تحفظ اغانى خدى بالك البلد كلها عرفت ههههههههههههههههه كان موقف محرج اوى ايه ايام وحشتنى الجوابات اللى كانت بتوصلنى من التلاميذ هو اه كانوا بيكتبوا كلمات كتير غلط بس اهم حاجه احساسهم ولما يقابلونى فى الشارع دلوقتى ويقولولى وحشت...

امبارح كان يوم ظريف لطيف وجميل خالص اتعرفت فيه على انسانة جمييييييييييلة اوى اتعلمت حاجات كتير حلوة منها وكفاية ان بداية اليوم بانى اشوف مامتها وهى كمان اللى عرفتنى كنت خايفة اوى ومترددة انى اعرف حد من عالمى الافتراضى عالم التدوين بس بجد انا مش ندمانة ابدا بل بالعكس سعيدة جدا كفاية انها فرحتنى بركوب القطر تانى لانه كان وحشنى اووووى واحساس انى اصحى واركب مواصلات الصبح كده رجعنى لايام الدراسة نفس الطريق ماشية فيه.. بجد احساااااااس تحفة انا عارفه ان احنا الاتنين حصل لنا موقفين بايخين جدا بس بجد هى طلعت قوية ومؤمنة .. ربنا يثبتها ياارب وينولها كل اللى فى بالها ويجزيها كل الخير يارب اما موقفى كان موقف مش ظريف خالص ههههههههه المهم ان الموقفين دول خلونا نغير الخطة بتاعتنا بدل ما نروح من كفر الشيخ للمنصورة على طول قررنا العودة بالقطار لمنزل كل منا فقط لمدة ساعة والخروج مرة اخرى ومواصلة اليوم ونكمل اللى اتفقنا عليه هى وفت بوعدها معايا مع انى لو كنت مكانها مكنتش هقدر اكمل اليوم ابدا المهم واحنا مروحين فى القطر من فرحتى بجد بمعرفتها كنت شايفة اللون الاخضر كتييييييييير اوى وكأن بشوف الشجر والسما ل...

امبارح بابا اخد اجازة من الشغل وكان عايز يروح الارض بتاعتنا وقالى تعالى معايا يا منى حبيبى كان حاسس بيا وانى مبخرجش من البيت بقالى كتير كانوا ساعتين بس بعمرى كله كالعادة بلاقى راحتى هناك لما بكون متضايقه اوى لانى الصبح مزاجى مكانش حلو علشان موضوع صاحبتى لانها عرفت انى حطيت حوارنا على المدونة وزعلت منى ربنا يهديها يا رب المهم كان اليوم تمام وعال خالص وطول منا هناك بفكر انى اعمل موضوع عن الارض وقعدت اصور كذا مكان هناك لان كل مكان له ذكرى عندى وكمان بسبوسة صاحبتى اتطمنت عليها واتكلمنا برضه مع انها وحشانى والصراحه مش بحب اكلمها نت ولا تليفون انا بحبها تبقى قدامى ونتكلم كلام جميل كلام معقول واليوم زى الفل ومفيش حاجه تعكنن عليا جدى كان فاتح نت وقالى مين اللى كان فاتح من شويه قلت له انا قال لا امال فين محمد .. ده قال كلام مش حلو وشتيمه و و و يا نهار ابيض والله يا جدو محمد نايم بقاله اكتر من 3 ساعات وانا اللى كنت موجوده اللى حصل بقى ان ايميل اخويا اتسرق والظريف اللى سرقه قال كلام مش عارفه اقول ايه ياربى غير حسبى الله ونعم الوكيل طبعا حصل تحول على طول ودخلت نمت ولا عملت موضوع الارض ولا اى حاجه ...

عمرى ما شفتها سعيدة ولا فرحانة زى ما كانت بتكلمنى النهاردة كانت عايزة تقولى على كل اللى حصل فى يومها وحصل وسمعتها كان يوم جميل وشافت فيه حبيبها بعد ما سمعتها جوايا حاجه واحده عايزة اقولها "معدتيش تكلميه علشان اهلك ونفسك ولو هو من نصيبك هيجيلك لو بعد كام سنة حتى او على الاقل لما تتخرجوا ويبقى راجل يعتمد عليه" انا حاسه انك بتخوني مامتك وباباكى بكلامك له وهما ما يستهلوش منك كده اللى كنت خايفه منه حصل .. وقتلت فرحتها واتقلبت الفرحة لبكاء جامد يا حبيبتى والله انا اسفه بس انا خايفه عليكى قفلت معاها وكلمتها بعد كده بحوالى نص ساعه لسه بتبكى طيب اعمل ايه حاولت اخفف عنها وقلت لها ده انا سمعت اغنية لام كلثوم جميلة بتاعة "دارت الايام" وبتقول فيها مقدرش على بعد حبيبى انا ليا مين الا حبيبى قالت لى شفتى انتى قلتى ايه؟ يعنى اللى طلبتيه منى ده معرفش اعمله وصعب عليا بصى بقى انا معدتش هروح الكلية خالص علشان تستريحى يا حبيبتى مش عايزاكى تاخدى قرار وانتى متضايقه انا مش عايزه افكر خالص والله انا خايفه عليكى ومش عايزاكى تندمى على حاجه انتى تعرفى منين ان هو هيكون من نصيبك بصراحة مقدرتش اكم...

ارادة الله لا قــــــرارى .... وحكمة الله لا اختيارى اتت بروحى الى وجــود .... تريد فى ساحه اختبارى اراد ربى اختبار ذاتــــى .... إرادتـــــى همـــتى ثباتى وكيف امضى مع الحياة .... وأين اغـــدو وما مسارى انى رضيت بما ارتضاه .... لــــى الإله ومــا قضـاه فـفى هــداه وفـى حمــاه .... مـأوى ومـنجى لكل سـار الحمد لله رب العالمين انا بخير دلوقتى واحسن كتير ربنا ما يحرمنى منكم ولا من وجودكم فى حياتى معلش انا عارفه انى قلقت ناس كتير بس عرفت اد ايه انتو بجد بتحبونى وبجد انا حبيتكم اوى الحمد لله

يا رب انا تعبانة اوى مش عارفه مالى حاسه بكل المفاهيم متلخبطة عندى حالتى دلوقتى زى ما كنت داخلة الجامعة لسه وبجد مش عايزه احس بكده تانى ابدا زى ماتكون دماغى اتفرمتت ومفيهاش حاجه خالص حاسه انى محتاجه اتعلم أ ب الحياة من تانى حاسه انى مش عارفه منى يا ترى يا مدونتى عارفانى؟ بقالى معاكى 10 شهور حكيتلك كل حاجه وارتحت معاكى اوى يا ترى عرفتى منى؟ لو عرفتينى ردى عليا وقوليلى انا مين؟ طيب ردوا عليا انتو انا مين؟ يارب لك الحمد على كل نعمة أعطيتها أو منعتها، فأنت أعلم بي مني بما يفيدني وبما يضرني.. اللهم يا مقلب القلوب ثبت قلبى على دينك استغفر الله العظيم واتوب اليه استغفر الله العظيم واتوب اليه استغفر الله العظيم واتوب اليه

السلام عليكم ورحمة الله وبركاته اولا الف شكر لكل اللى سأل على شغلى فى المدرسة ربنا يخليكو ليا يارب واحب اقول لكم قدر الله وما شاء فعل محصلش وانى رجعت المدرسة واختاروا ناس تانية الحمد لله انا مش زعلانة والله جايز علشان انا عرفت الخبر ده وايمانى زايد وكنا فى ايام رمضان وكنت سمعت قصة عن الرضا بقضاء الله عروة بن الزبير، هو ابن أخت السيدة عائشة رضي الله عنهم ذهب ذات يوم هو وابنه لأمير المؤمنين في دمشق فذهب الصبي ليلعب مع الخيل فدهسته فمات. وعندما أرادوا إخباره بما حدث ذهبوا ليلقوه وقد أصابته الآم شديدة في ساقه وأخبره الأطباء عن وجود ورم فيها ولابد من بترها. فما علم الناس فيما يعزونه: فقد ابنه أم بتر ساقه. قال عروة بن الزبير: اللهم لك الحمد كان لي سبعة أبناء أخذت واحداً وأبقيت ستة، وكان لي أربعة أعضاء أخذت واحداً وأبقيت ثلاثة، فإن كنت قد أخذت فقد أبقيت، وإن كنت قد منعت فقد أعطيت، فلك الحمد على ما أخذت ولك الحمد علي ما أبقيت ولك الحمد علي ما منعت ولك الحمد علي ما أعطيت بجد اثرت فيا اوى الحمد لله وبعدين انا طلعت من المدرسة دى بأصحاب جميلة اوى وكان فرح واحده منهم امبارح ماشاء الله كانت عسولة او...

السلام عليكم انا عايزاكم تدعولى اوى بالله عليكم بكره ان شاء الله هروح المدرسة الخاصة اللى كنت اشتغلت فيها السنة اللى فاتت وسيبتها علشان الدبلومة هيبقى فيه حاجه من اتنين يا اما ان شاء الله ربنا هيكتبلى انى ارجع واشتغل فيها تانى يا اما هرجع بالملف بتاعى.. ويارب ما تحصل لانى ساعتها ممكن انهار بجد بجد اليوم ده هيفرق اوى فى حياتى يا رب انت عارف الخير ليا سواء شغلى فى المدرسة دى او انى ما اشتغلش عموما ربنا يقدر اللى فيه الخير دعواتكم دعواتكم دعواتكم ربنا يخليكو ليا ومايحرمنى منكم ابدا ــــــــــــــ ـ ـ ـ ــــــــــــــ تحديث ‏02:50 م ‏14/‏09/‏2008 صحيت الصبح.. فتحت المدونة وقريت دعائكم ليا بجد ادانى دفعة جامده اووووووووى وحسيت بالتفاؤل وتوكلت على الله ورحت المدرسة ركبت العربية وحصل حوار بينى وبين السواق قال انتى كليه ايه وكده .. طيب ناويه تشتغلى؟ قلت: ان شاء الله انا هقدم اهو ادعيلى قال: ربنا يوفقك.. بس مش حرام الوش السمح ده يتبهدل!!!! انا: .......... طبعا معرفتش ارد واقول ايه وفعلا حسيت انه عنده حق للحظه.. انا ليه ابهدل نفسى؟؟ بس الحكايه مكانتش ناقصه بصراحه المهم رحت المدرسة ولقيت ترحاب ...

امبارح كان يوم عجيب بشكل كنت الصبح بدرى متضايقه ومخنوقه وبعيييييييط بطريقة رهيبة اختى اقترحت اننا نروح كلنا الارض بتاعتنا وتبقى فسحة النهاردة بما ان والدى كان نشيط وماشفناهوش كده من زمان قال خلاص انا هسبقكم وبعد ما تخلصوا اللى وراكو حصلونى قلت فى بالى ياريت يسيبونى كلهم ويخرجوا واقعد انا مكتئبة مع نفسى وبعدين فكرت ليه ما اخرجش واغير جو.. وانا اصلا بموت فى الارض وببقى ساعات كتير عايزه اروح بس ما ينفعش اروح لواحدى المهم قلت لماما واخواتى انا هروح مشى وانتو اركبو وابقو حصلونى رحت ولقيت بابا مستنينى ودار بينى وبين بابا حوار جميييييييل كان فى كل حاجه تقريبا دين.. سياسة.. فن.. ادب يااااااااااااااااااااه من زمان ماتكلمتش معاك يا بابا وحشتنى بجد انا فاكرة واحنا صغيرين وكنت بتجمعنا انا واخواتى ونلف جوله حول العالم فى الاطلس بجد كانت ايام جميلة ومفتقداها بشكل غريب من زمان ما حسيتش الاحساس ده والله كنت مفتقداك اوى يا بابا ربنا يخليك لنا ويبارك فيك ويديك الصحة ويشفيك ويعافيك ويروق لك بالك وتفضل كده من تانى وحشنى شكلك وانت بتتكلم اوى وحشتنى لمتنا كلنا وكلامنا وتقعد تفتكر ذكريااااااااات زمان مع مام...