My photo
I'm a girl who lives sometimes in a good mood and sometimes oh in a very very bad one

Friday, September 21, 2012

اصحاب

 
قعدة الاصحاب غير اى قعدة برضه
وحشونى اوى ومهما نتكلم فى التليفون مش زى ما نكون مع بعض
يوم الاربع انا رحت مع منى كفر الشيخ علشان الشهادة بتاعتنا وطبعا لسه ما طلعتش - منا عايزاها ابروزها واعلقها واتفرج عليها يعنى لا اقدمها فى شغل ولا تونسنى فى البيت -
النهاردة رحنا لنبيلة العروسه الجديدة نبارك لها وبرضه لمتنا مع بعض حاجه تانيه
الحمد لله رب العالمين

Friday, September 7, 2012

نعود للفضفضه

احم احم
طبعا منا لازم استأذن قبل ما ادخل 
المدونة بقت مهجورة اوى مش كده
وكان شكلها كئيب كده 
مفيش تجديد
بس لا.... قررنا نحن منى نغير شكلها
ونديها تدوينه جديدة
يلا بقى ان شاالله ما حد حوش
-------
امبارح انا عملت حاجه حلوة اوى 
قعدت امص قصب
وعملت حمام زيت لشعرى
وحطيت رجلى فى مايه
من زمان ما عملتش حاجه زى كده او محسيتش انى براحتى كده
------
دايما دايما هى بتكون السبب فى المشاكل
هى مش بتقصد تعمل حاجه بس من كتر ما بتضغط عليا بنفجر فيه هو
وده غلط انا عارفه
------
احنا كبرنا يا ولاد
الدنيا خدتنا اوى
بقى كل همنا العيال
كل اصحابى
اللى عندها طفل... كل فين وفين لما بكلمها 
واللى عندها اتنين .... تقريبا معدتش بعرف اخبارها
------
هو انا دلوقتى عندى كام سنة؟؟
 26 ونص
يعنى فى نهاية السنة هبقى 27
مش عارفه ليه حاسه مادام 27 جت هتيجى وراها 30 على طول بدون اى سنين فى النص
------
نفسى اشتغل اوى
لانى زهقت من قعدة البيت زائد انى بقيت حاسه انى جاهله اوى ومنعزله عن الدنيا
بس ارجع واقول منا كده مرتاحه واحسن من البهدلة
نفسى رشا لما تكبر تلاقى مامتها حاجه كبيرة كده وتفتخر بها
بس مفهوم ست البيت دلوقتى اختلف مش كده؟
------
مبسوطه انى كتبت فيكى يا مدونتى
بس عايزه كمان بوستات من بتاعة زمان دى وروحها الحلوة
يلا ما علينا
كل سنة وانتو طيبين علشان رمضان والعيد اللى فاتوا ومكنتش معاكم
ولا نخليها للعيد الجاى:D
سلام يا حلوين